زمان يا حب

1
زمان كانت معروفة فكرة الولد اللي مستفرد بالبنت في بير السلم
خلاص فنيتو بقت موضة قديمة
شفت بنوتة مستفردة بولد على بسطة السلم وهارياه بوس
والواد ياعيني مفرهد فى ايديها
ليتنى عدت صبيا يا بشر
2
قال لنا : كل ما احب بنت اكون جدع معاها بجد
وف الآخر تقولي : انت اعز اصحابي
رد صاحبنا: بسيطة اول ما تعجبك بنت
افتح عليها المطواة وقول لها: انا ندل وباكره اصحابي
هتحبيني ولا اغزك
قلت : ولا طلعت مأمنة نفسها يا فالح وغزته هي
وقالت له : كان غيرك اشطر يا فرفور
3
اليوم السابع نشرت ان فتنة طائفية بدأت في مدينة بالصعيد
لما اهالي البلد لقوا شاب مسيحي موجود ف بيت دعارة مع واحدة مسلمة
وكمل الخبر بمحاولة قتله
الغبي كان لازم اول ما يدخل بيت الدعارة يسأل مين فيكم بتصلي يوم الجمعة ومين بتصلي يوم الأحد
4
قالت لي : ليه مستغرب ان واحد ممكن يضحي بمليون دولار علشان اللي بيحبها
قلت لها: اصحي.. الناس دلوقتي بتحب بعض برسالة على الفيس بوك
وتفركش بمسج على الموبايل
5
حكي لنا أنه قالها : وانا قاعد معاكي كأني واكل كيلو لحمة من بيت منيسي
طبعا عرفنا قد ايه بيعشقها
خصوصا وجزارين بيت منيسي عندهم احسن لحمة في سنورس ويمكن في الفيوم
وبعض المعجبين بيبالغوا ويقولوا في مصر المحروسة كلها
أشرف
ملحوظة: كل سنة والناس كلها بخير بمناسبة العيد
وقريبا تدوينة : آي دونت سبيك فرنش

كرة النار

الأجواء قبل مباراة مصر والجزائر في القاهرة كانت تشبه كرة الثلج التى تكبر كلما تدحرجت وزاد التوتر مع المعالجة الإعلامية التى خرجت من إطار الرياضة للسباب والشتائم والمعايرة بما فعله الآباء من الأجيال السابقة ووصل الأمر لحرق أعلام مصرية ومكاتب لشركات مصرية في الجزائر كما وصل العبث لرشق أتوبيس اللاعبين الجزائريين في القاهرة بالحجارة ..كان الوضع عبثيا
لكن
الوضع بعد مباراة الفريقين في الخرطوم تحول إلي كرة نار كلما تقذفها على الطرف الآخر تعود وهي أكبر ومتأججة بالنار التي ستحرق الجميع
وكم كانت مفزعة صورة المصريين الذين يهربون من فرق البلطجية الجزائريين المدربين لذين يرفعون السكاكين والسيوف في رقصة دموية تشبة المسرحيات السوداوية ..لقد خرج الأمر عن السيطرة
لم تعد كرة بل كراهية
ضاعت البوصلة ووضع كل طرف نجمة داود على علم الطرف الآخر
وبدأت تدق طبول الحرب بين البلدين
.....
تلح علي الذاكرة ما قرأته عن صراعات ملوك الطوائف في سنوات انهيار الأندلس وكيف استعان كل منهم بالعدو لينصره علي بني وطنه
حتى افترسهم العدو جميعا
....
لقد خلطنا الاوراق وصرنا نتنادي من أجل العنف والقتل ..لم أعد اطيق مطالعة الأخبار فهي أيام سوداء سوف تظل كالكابوس أو كصفحة سوداء يكتب عنها فيما بعد الشعراء كرثاء لشعوب اندثرت كانت تسمي العرب
....
للمرة الاولي ساستخدم هذا الجملة التي لم اكن احبها
لكن وبدون اعتذار :اي عابر على هذه المدونة ويحب التعليق ..عليه التزام الأدب وعدم استخدام السباب والشتائم
أشرف

حصل خير

اليوم وقعت من سيارة تتحرك
حصل خير
كما قال من ساعدوني على الوقوف
لولا خوفى من الظن أني أسخر من مساعدتهم لضحكت
خاصة وقد وقعت بشكل غريب
فقد تمددت فى عرض الشارع على ظهرى فاردا طولي بالكامل
كما لو كنت مسترخيا فى سريري قبل النوم
لم تتوقف حركة السيارات
ولم يشغل بال الواقفين إلا سيارات الاجرة التي قل عددها فزاد الزحام
أنا أيضا بعد الوقوف أسرعت للحاق بسيارة أخري
حصل خير
ولم أوجه كلمة لوم واحدة للسائق الذي سقطت من سيارته
بل كنت طوال طريق العودة ألوم نفسي
فبعد كل تلك السنوات فى القاهرة لم أكتسب مهارة أهلها
فى ركوب السيارة وهي تتحرك
ولا النزول منها وهي تتحرك
ولا حتى السقوط منها
وكل ما اكتسبته هو تقبل الأمر ببساطة الحدث اليومي العادي.
أشرف نصر

شريط كاسيت

صاحب الصورة صديق قديم

شغلتنا الحياة عن السؤال
فتوقفت عن الإطمئنان عن صحته
وتوقف هو عن مؤانستي
...
كان يغني ليل نهار
أغاني ذلك الزمن
أو أغاني زمن لم أعشه
ومرات يسمعني مسرحيات وحفلات خاصة
عن أبطال وقصائد وشعراء بدوا كأبطال الأساطير
فعرفت من خلاله أصواتهم وضحكاتهم وسعالهم وحزنهم
ولأنه الصديق الأمين حمل لي رسائل أبي المسافر
وحملته الرد فلم يخذلني أبدا
واحتمل نزوات الصبا
فأصبح رسول الغرام بيني وبين محبوبتي
...
في بيوت كانت تغلق أبوابها على أبنائها مبكرا
كان ليل الشتاء طويلا كالدهر
ولولاه لجننت من الصمت
فكنت أصر أن يظل يحكي
ويغني
ويسجل ما أقول
...
كثيرا ما أصابه التعب فتختلط كلماته
فأظل أحاول حتى يتعافي
وأحيانا كنا نتشاجر فأضربه واحطمه
ثم أبذل ما في وسعي لإنقاذ حياته
وحياتي
...
صديقي العزيز
اشتقت لك ولزمانك
أشرف نصر

نعم لسيد أبو حفيظة رئيسا

نعم لسيد ابو حفيظة رئيسا لمصر .. هل من منافس ؟ وحد يجرؤ على منافسة راجل تاريخه ناصع البياض زي سيد.. سيد يا حضرات هو الدماغ اللي كانت بتفكر في تنظيم الظباط الاحرار وهو اللي زغر للملك فاروق وهو بيقرا عليه الانذار فهرب الملك بجلده وفي المنشية هو اللي مسك اللي حاول يضرب عبد الناصر بالنار هوووب اترمي عليه بكل تقله جابه الارض.. اقول ايه بس ولا ايه..اذا كان يا بشر
ميعاد حرب اكتوبر مكانش يعرفه غير اتنين السادات وابو حفيظة
السادات بحكم انه الرئيس وابو حفيظة بحكم انه هو اللي حط الخطة
ومن انكاره للذات كان اول واحد رفع العلم ع الناحية التانية
وستر ربنا نجاه يومها لأنه ميل يجيب سلسلة حبيبته اللي وقعت فالعدو ضرب اللي وراه لحد ماجاله المدد
وصحيح قضاء الله لا يرد لكن هل كان ممكن يحصل اغتيال السادات لو كان سيد حضر العرض
اشك
سيد اللي كان السبب الحقيقي ورا احداث الامن المركزي في86 والعساكر بتهتف بحياته اضطر للابتعاد عن الحياة السياسية علشان ميحرجش نظام مبارك
لكن خلاص الكيل فاض بينا يا أبو السيييد كلنا عاوزينك
ومعاك
...
من فضلك شارك في حملة ترشيح سيد أبو حفيظة رئيسا لمصر
بأي حاجة ولو ساندويتش.. ربنا يجعل بيوت المحسنين عمار
...
** لمن هم خارج الزمن ولا يعرفون صناع التاريخ الحقيقيين
ولا يعرفون الاسطورة سيد أبو حفيظة تابعوا برنامج الكابوس علي الفضائيات
في البرنامج بعض من فتوحاته في الفن والاعلام والرياضة وكل مايخطر علي البال
....
ابو حفيظة يا يعيش يا يعيش يا يعيش
أشرف نصر

قسم النحت

نحن فى موسم التنسيق ودخول الكليات لطلاب الثانوية العامة
اتمنى الا تتكرر مأساة الاعوام الاخيرة
في عدم تقدم الطلاب لقسم النحت بكلية الفنون الجميلة
خضوعا لتيار الفتاوي التي تعتبر فن النحت من المحرمات
......
فى العشرينيات من القرن الماضي
جمع الشعب المصري فى اكتتاب شعبي من ماله
ومن قوت يومه رغم الاحتلال والفقر وشيوع الأمية
المال الذي نفذ به
المثال العظيم محمود مختار تمثاله الشهير نهضة مصر
وكان مختار يقول: الشعب هو صاحب التمثال ولست أنا
....
زمن يبدو كالحكايات الخيالية الجميلة
....
الصور: نهضة مصر
كاتمة الأسرار
من موقع متحف محمود مختار
http://www.mmukhtarmuseum.gov.eg/home1.html
....
يرحم أيام زمان
وناس أيام زمان

أشرف

إن إن إن

مش أنا غنيت فى حفلة قدام الناس
اللي يعرفوني ممكن يتخيلوا الكارثة
ممكن خيالهم يتصور شكلي زي الفار المبلول
ولو سرحوا بخيالهم ممكن يتوقعوا الكراسي نازلة ترف
ولو الخيال سرح حبتين ..يتخيلوا الناس وهي بتقطع لساني
.....
لكني غنيت وأنا ف ابتدائي
كانت الأبلة والناظرة (حكومي يا آبا ..مكناش بنقول مس ومسز) متسامحين
والعيال زمايلي اتحملوا صوتي الفظيع المريع بفرحة وغنوا معايا
......
ورحمة بالفن وناسه كانت أول وآخر مرة
ومن ستر ربنا ساعتها لسه ما كانش فيه
موبايلات ولا يوتيوب بقي وفضايح
كان زماني باتعرض للابتزاز ودعاوي تعويض للصبح
....
ماعادش فيه حفلات ف المدراس
مش بسببي والله
لكن مرة يتحججوا بحجة الميزانيات (المدارس الحكومي هي اللي تعنيني)
ومرة الناس شايله الهم ومحدش له نفس يفرح ولا يفرح العيال
ومرات لأن كل ما كنت باكبر كان بيزيد عدد اصحاب الفتاوي
وبيزودوا مساحة المحرمات من الحفلات والغنا لحد السلام علي الناس
واسمها عندهم:مصافحة الاجنبيات
وطبعا لازم يقولوا بعدها: والعياذ بالله
.......
كانت أغنية عبد المنعم مدبولي المشهورة ساعتها
فعملت راجل عجوز ومسكت العصاية
وغنيت وغنت معايا المدرسة كلها
إن إن إن
أن ان أن
الشمس البرتقاني عليها ليا سنه.
أشرف نصر