Jul 27, 2007

شريط رسائل قناة الحب كله

أكيد خطف عينك ف مرة شريط رسائل في قناة فضائية ..ومن يتابع تلك الرسائل يمكنه التعرف علي مجتمعاتنا ولو فكرة مبدئية ..بص وشوف
1- حالة كبت وفراغ عاطفي ليس له حدود ..مثلا قناة روتانا زمان ستجد بها اقبالا غير عادي علي مراسلة شخص يتخذ لقب الظل يعطي كمية هائلة من النصائح وخاصة للبنات
طبعا غير الرسايل اللي تضحك زي :أنا شبه ميرفت أمين عاوزة أتعرف
مش فاهم اللي شبه ميرفت برضه هتدور علي شباب ف الشات
ولا دي : رجل أعمال يبحث عن ليدي
وآخره أعمال يدوية صنايعي يعني ومكسوف يقول
2- حالة من هوس الدعوة للإيمان ..اللي يطلب من الناس أن تقول الأدعية الاسلامية ..واللي يهني بالجمعة المباركة رغم انه وقت صلاة الجمعة ..طيب روح صلي مثلا ..واللي هاري الناس بطلب دعاء الله بالشفاء له أو لأحد أقاربه ..ومش فاهم هل ربنا محتاج قراءة شريط الرسائل ليشفي عباده ..طيب اللي رصيدهم خلص ايه النظام
تحبوا سؤال محرج : لو مسيحي بعت رسالة حب في يسوع أو العذراء بلاش هيدعي الناس لدينه ..تفتكروا هتتعرض
3- ناس كتير بتفرح بقراءة اسمها ومش مهم ليه ..اللي بيمسي علي الحاج فلان
واللي كاتبة : والنعمة بحبك يا زوجي مراتك فلانة
وخد عندك :اللهم اصلح بيني وبين زوجتي فلانة ..طيب ده تقوله ايه
غير طبعا اللي نازل تأييد علي روحه في أي انتخابات ولو انتخابات الجراج
4- لازم تظبط القناة بكلمتين حلوين علشان الكنترول يهتم برسالتك ..واكبر مثال يضحك قناة المحور
اي حاجة تعرضها تنزل الرسايل محبة في القناة حتى لو اعلان سمنه هتلاقي برافو المحور موضوع مهم كنا محتاجينه
5- انسي السياسة كل القنوات ما بتعرضهاش او بتعرض الرسايل الامان يعني بارك الله في الملك فلان أو الرئيس علان
6- الحروب الحقيقية هي بين مشجعي الكرة بين :النادي الفلاني أعظم أندية الكرة الأرضية والكرة الشراب
ولازم طبعا بهدلة الاندية الاخري وهي اكثر الرسائل التي تفلت فيها الشتائم من الكنترول ربما عن عمد
7- الموضوع مربح جدا بدليل ان كتير من القنوات جابت م الاخر واقتصرت علي الشات
وبلا برماج بلا وجع دماغ ..خاصة في الخليج وادفع يا فالح

أخيرا جاء لقناة الحب كله رسالة : أنا
مدون شاب أرغب في صداقة فتاة أمورة شبه مونيكا بيلوتشي
وأمرنا لله لو شبه كيت وينسلت
أشرف نصر

هكذا نعامل الشعراء


آخر خبر عن الشاعر الكبير أحمد عبد المعطي حجازي لم يكن تكريما يليق بابداعه الجميل وريادته للشعر العربي الحديث ..وإنما كان الحجز علي منقولات شقته من تليفزيون وفيديو وحتي اسطواناته لسداد تعويض بسبب حكم صدر ضده لصالح أحد مشايخ التطرف ..وهذا االشيخ تخصص في مطاردة الفنانين والكتاب ورفع القضايا ضدهم ..أظنه مؤسفا أن يكون عقاب صاحب الرأي بهذا الشكل والمؤسف أكثر أن صاحب الرأي أحد كبار شعراء هذا الوطن ..قالها
حجازي منذ زمن بعيد
شمسك يا مدينتي
قاسية علي وحدي
تتبعني أني ذهبت
تأكل ثوبي
وتعري سوأتي
أهرب منها أين يا مدينتي
وهي تنام تحت جلدي
أحمد عبد المعطي حجازي
من ديوان :مدينة بلا قلب
أشرف نصر
الصورة من : www.diwanalarab.com

Jul 26, 2007

بحب السيما

الجدل الدائرالآن هل السينما المصرية أتمت مائة عام حسب أول عرض سينمائي بها أم نؤجل الاحتفال إلي 2027 وهو تاريخ أول فيلم مصري وهو ليلي ..في الحقيقة الجدل مهم خاصة بين الباحثين السينمائيين
لكن الأهم لعشاق نلك السيبما هو البحث عن مسار تلك السينما العريقة

التي مرت ككل ما نفخر به لحالات الصعود والهبوط ..ربما تمر السينما المصرية الآن لمحنة قاسية في هذه السنوات



لكن في الحقيقة دائما ما أفلتت روائعنا السينمائية من محن وظروف قاسية




وإذا نظرنا لتاريخ إنتاج أفلام مهمة مثل السوق السوداء أو السقا مات أو سواق الأتوبيس وصولا إلي باب الشمس




سنجد أن الأعوام التي أنتجت بها تلك الروائع رافقتها أفلام في منتهي التفاهة ولا تستحق الخام الذي صورت به



وقد أخترت صورا كمجرد نماذج لبعض روائع السينما المصرية






كتحية للسينما المصرية العظيمة
سواء أتمت المئوية أم لا
أشرف نصر

Jul 25, 2007

حكومة الفنطاس

نفسي أعرف مين العبقري اللي اخترع حكاية الفنطاس لتوصيل مياة الخزانات للقري التي تعاني العطش ..المياة لا تكفي نصف ساعة والمعارك اشتعلت بالشوم والحجارة بين الأهالي كما رأينا في الصور المخجلة التي نشرت اليوم في جريدة المصري اليوم ..ولا محدش شاف من حكومة البهوات الست اللي جت في المحور وكانت هتعيط وهي بتقول نفسي الاقي ميه اتوضا ..بالذمة لو قرية سياحية ولا مملكة شرم الشيخ التي يعيش بها مبارك هي التي انقطعت عنها المياة كانوا برضه هيودوا فنطاس ويبقوا البهوات ساعتها يضربوا بعض علي اللي يملا جركن ..زمان كانت

بلد شهادات

علي ايد الحكومة

بقت بلد الفنطاس

الست عاوزة تتوضا يا

....................................

أشرف نصر

Jul 24, 2007

آه يا أمل





لا يحتاج أمل دنقل مناسبة لأنذكره ..ولا يحتاج لتقديم سوي تقديم كلماته

:يقول ملاك الشعر

آه من يوقف في رأسي الطواحين

ومن ينزع من قلبي السكاكين

ومن يقتل أطفالي المساكين

لئلا يكبروا في الشقق

المفروشة الحمراء

خدامين

مأبونين

قوادين

من يقتل أطفالي المساكين

لكيلا يصبحوا في الغد شحاذين

يستجدون أصحاب الدكاكين

وأبواب المرابين

ويبيعون لسيارات أصحاب الملايين

الرياحين

وفي المترو

يبيعون الدبابيس و" يس"..و

ينسلون في الليل

يبيعون الجعارين

لأفواج السائحين

هذه الأرض التي ما وعد الله بها

من خرجوا من أصلابها

وانغرسوا في ترابها

وانطرحوا في أرضها

!!مستشهدين

فأدخلوها بسلام آمنين

أمل دنقل

الصورة من :www.alriyadh.com

دارفور اللي بنسمع عنها طشاش

بمناسبة التدوينتين اللي فاتوا عن مشكلة انسانية زي اللي عند المعابر وسياسية زي حدودنا ..فين مصر من اللي بيحصل في دارفور ..يشكروا طبعا بتوع نقابة الاطباء وحملاتهم ..لكن بس كده هو ده آخرنا ..معقولة العالم كله مهتم ..بمأساة دارفور واحنا ف الغيبوبة ..طبعا النظام السوداني تلميذ النظام المصري اتعلم شعار

كله تمام والمشكلة بسيطة بس فيه شويه عناصر مندسة ..اقول ايه

save darfor

انقذوا دارفور لو لسه بني آدمين

أشرف نصر

حدودنا كيف نفكر بها

شيء غريب جدا مصر لها جهات اربعة الاصغر فيها هي الحدود الشرقية والغريب أننا نضيع كل مجهودنا في التركيز تجاهها دائما نركز علي ثلاثي اسرائيل -الاردن -السعودية صحيح أن لنا تراث من المشاكل الأتية من هناك لكن

أين الجنوب في تفكيرنا ..لماذا أهملنا السودان حتي تحولت مشاكله مآسي وكوارث تضرنا نحن أيضا ..ولماذا لا نتواصل مع الشمال الأفريقي ..كيف نتجاوز شطحات القذافي لنتواصل مع تونس والجزائر والمغرب ..الأهم

لماذا نسينا أننا نطل علي البحر المتوسط ..اليونان - إيطاليا - فرنسا وغيرها ..هل نسينا الاسكندرية ومكانتها في العالم واهمية دعمها كشرفة نطل منها علي أوربا ..

ماذا نفعل بحدودنا مع العالم

لو سألوك عن الدور المصري قول

كل سنة وأنت دور

أشرف نصر

الفلسطينين العالقين ..عيب يا حكومة

منذ حدثت أحداث غزة بين عصابة فتح وعصابة حماس وأنا احس بالغضب الشديد تجاه ذلك الشعب الذي يقتل قضيته بيده ويضيع دماء شهداءه وشهداء غيره خاصة مصر ..عبر صراع أحمق الكل فيه خاسر

لكن تعامل الحكومة المصرية مخجل بالنسبة لاغلاق معبر رفح ومطار العريش في وجوه الخارجين من مصر ..المشكلة ان الحكومة لا تريد بقاءهم في مصر ولا تفتح لهم المعبر للخروج ..رائحة صفقة حقيرة لمساندة عصابة فتح ضد عصابة حماس خاصة وحدودنا اصبحت مع الأخيرة ..لكن لا يليق أبدا بمصر أن يحدث بها تلك المأساة ..اكثر من شهر ونصف وهم عالقين يعشيون علي المساعدات ويموت منهم المرضي دون حاجة للمساعدات ..عيب ...عيب يا حكومة

لو مش مقدرة انتي حكومة أي بلد ارحلي ..لكم مصر أكبر وأعظم ألف مرة من كده

أشرف نصر

Jul 17, 2007

حتي العطشانين هددوهم بالاعتقال

نشرت المصري اليوم تهديدات الامن للعطشانين في الدقهلية بالاعتقال اذا لم يفضوا مظاهرات العطش ..الامن عودنا ان اسهل حل عنده ارهاب الناس ..المرة دي الناس لا طالبين حرية ولا ديموقراطية ولا حتي حوافز زي العمال ..الناس طالبين مياة شرب نظيفة يعني أبسط حق من حقوق الانسان ..الغريب ان مبارك صدعنا اكتر من 25 سنة انه انجازاته كانت في عمل بنية تحتية لمصر ..ماشي رحمتنا بحكمتك من الحروب وعيشتنا السلام والامان فين بقي فلوس مصر اللي ضاعت مواردها من 1981 علي البينة التحتية بتاعتك ..إذا كانوا الناس مش لاقيين نقطة ميه
أشرف نصر

Jul 16, 2007

حملة خليك بالبيت


هي حملة أطلقها الشباب ليجلس المصريون بالبيت في 23 يوليو ورفع علم مصر
احتجاجا علي ما وصلت إليه الأوضاع
الحملة تبتنها عددا من القوي السياسية كحركة كفاية وحزب الكرامة وغيرهما
المهم هو ان الحملة تلقي قبولا واسعا علي شبكة الانترنت
فهل نجد نفس القبول عند الناس وننسي للحظة كلمة مفيش فايدة
نسينا كل كلام العظيم سعد زغلول وافتكرنا بس دي
أتمني ذلك
أشرف
الصورة من : miladyacoub.free.fr

Jul 14, 2007

عيد ميلاد

قصة : أشرف نصر
هكذا انزوى في غرفته تاركا سؤال أبيه عما به معلقا دون إجابة ..يحاول أن يمنع ضجيج إخوته الصغار فأخذ يقلب في شرائطه ليختار ما يسمع ..لم يستطع الاختيار فوضع واحدا منها في الكاسيت بلا اهتمام ..لا يعرف لماذا يسيطر عليه الحزن هكذا ..لم يكن ممن يخفون أعمارهم فكثيرا ما زاد علي عمره في حديثه مع الآخرين ..يحلم بتوقف الزمن كما توقفت ساعة الحائط ..رغم توقفها منذ شهرين لكنه كلما احتاج معرفة الوقت نظر إليها ، وكأنه يتمني أن تتحرك عقاربها فجأة ..يحاول أن يطرد من ذاكرته أحداث يومه الطويل ..فتحل بدلا منها أحداث عامه الذي لم يبق منه سوي ساعات قلائل ..في مثل هذا اليوم ترك فتاته دون أن يأخذ هديتها حين هنأته وسألته عما ينوي في عامه القادم ..قالتها بلهجة خاصة أو ربما تصور ذلك بسبب سخونة شمس ميدان التحرير ..تذكر يومها تلميحاتها المتتالية عن المستقبل والخطوات الإيجابية ..يغمض عينيه الآن محاولا استرجاع لحظات الفرح علها تزيل ما بداخله ..استعاد رحلته إلى مصيف الفقراء كما يسمونه ولياليه الجميلة ..مداعبات الفتيات ومشاغبات الأولاد وانطلاق مشاعره الغريب عليه ..ابتسم حين خطرت له قبلة البنت التي تعرف عليها قبل السفر بيوم واحد ..لكنه عاد واكتشف أن العناوين وأرقام التليفونات التي أخذها ليس لها داعي ..تجيئه صورة مديره في العمل الذي قضي فيه عده اشهر لم يحتمله فيها .. وعاودته الابتسامة حين وجد أن مديره لم يكن سيئا لهذه الدرجة كما لم يكن هو ملاكا لهذه الدرجة ..ضحك أكثر حين تذكر منظره وهو يسقط من الأوتوبيس الذي خدعه وانطلق بعدما ظن انه توقف لينزل .. وبدلا من ذلك هوي ليبقي في سريره عدة أيام لا يذكر عددها وإنما يذكر قسوة ألم ظهره ..ربما يضحك الآن لأنه تخيل شخصا آخر ذلك الذي ينزل بكل ثقة ورأسه المرفوعة لأعلي وصدره الرياضي وهندامه الأنيق يومها ..
كل ذلك رآه مطروحا علي إسفلت الطريق بين السيارات المسرعة ..وحين سقط وقام لم يهتم أحد بأن يساعده علي الوقوف ..تماما كما لم يهتم سائق الأتوبيس بالتوقف ليري ذلك الذي سقط ..انتهي الشريط فنهض يبحث عن غيره ثم ترك البحث حين وجد بين الأشياء رسالتها الأخيرة ..يقراها بتمهل ويجد لأول مرة أن مبرراتها قوية نوعا ما .. وأنها ليست ملزمة بما يراه هو عن طبيعة علاقتهما ..لم يغضب منها هذه المرة ولم يلعن زمنه القاسي ..ولم يحاول ككل مرة أن يخرج صورتها ليصب لعناته علي عينيها الخائنتين ..يجدها فرصة ليكمل بحثه في أوراقه المهملة ..وجد صورا قديمة وأوراقا صفراء ورسائل لم يرد عليها ..ووجد أيضا رسالة صديقه التي يعتذر فيها عن عدم إرساله خطابات في القادمة مدعيا عدم استقراره ..يهز رأسه ويندم علي انه سأله أن يبحث له عن عمل البلد التي سافر إليها ..يقلب في الكتب المكومة علي منضدته ..باحثا عن بعض القصائد التي يحبها عله يهدأ فلم يقدر علي القراءة فالقي بالكتب ليسكنها التراب مرة أخرى ..ها هو اليوم الذي حاول أن ينبه من حوله باقترابه يمر دون أن يسأل عنه أحدهم ..
في البداية ظن أنهم يعدون له مفاجأة ما ..أو علي الأقل سيهاتفونه معتذرين عن عدم حضورهم ..وسيداعبونه عن فرار السنوات من بين يديه ..لكنهم لم يفعلوا شيئا من ذلك ..لما وقعت عيناه علي شهادات التقدير التي تحتل جزءا من حائط غرفته يتعجب لأنه لم يحرقها ..لم تعد تهمه في شيء فلم يعد يكتب ولم يعد هناك من يريد سماع ما يكتبه ..حتى خدعته القديمة بأن يرسل بإسم فتاته للمجلات ثم يخبر المحرر بعد النشر بالحقيقة لم تعد تجدي ..يكره ذلك الحزن الذي يعتصر قلبه ..ويحس بسخونة أغسطس تجتاحه فجأة .. يزيد من سرعة المروحة فتزيد من الفتور الذي يسكنه ..
ذلك العام القادم لا يضمن استكماله بحياته هكذا .. ولا يستطيع أيضا أن يحلم بانقلاب ما أو تغيير مفاجئ ..يلتقط سماعة التليفون ..تدور ذاكرته علي الأرقام التي تسكنها يفكر في كل رقم ويستدعي صورة صاحبه أو صاحبته ..يجرب أحد الأرقام وبينما يجيئه الرد لا يجد لديه رغبة في الحديث فيضع السماعة دون أن يتكلم ..ينظر لساعة الحائط
ويغمض عينيه محاولا النوم .
أشرف نصر

حكاية مزلقان

نص عامية : أشرف نصر
كلها عشر دقايق من مطار الصعايدة المشهور بمحطه قطارات الجيزة لبوابه جهنم المشهورة بمزلقان المنيب .. عشر دقايق واربع محطات وشويه تفاصيل وتوصل من داخل مصر لأول طريق الصعيد .. والحكاية كلها شويه تفاصيل من قفف وجلاليب ووشم علي دقن او ضهر الايدين او دقون وعرق وسجاير وشتايم بتتنطور شمال ويمين ومطبات ومعاكسات ولو بصيت علي الحيطان هتلاقي النجمه السداسيه وتحتها بالبنط العريض
اسرائيل fuck
ويمكن بعدها الحجاب قبل الحساب .. والاهلي مكتسح الزمالك
ولو فتحت ودانك او حتي قفلتها برضه هتسمع عيال بتنادي ..
متروو..مترووو .. بولاااق بولااااق ..عزبه وابو النمرس عزبه عزبه
وراجل باسنان واقعه بيقول لمراته :
- مش انا اللي باقول ده ربنا اللي قال لعن الله العزب والكفور .
أول ما توصل للمزلقان هيحاصروك
منيا .. ملوي ملوي ملوي
وواحد تاني :
يا ام بلاش يا بني سويف ..3 جنيهات للعمه و4 للبنطلون وبندفع للكعب العالي بس ينورنا ..
وصف قزاز عربيات راكنه ومنقوشه
الضوء الشارد والمواطن مصري ولغايه كشكشها ما تعرضهاش
واكيد هيصعب عليك غفير المزلقان بهدومه المهريه ودقنه الطويلة وشعره المنكوش وهو بيزيح الناس زيح علشان قطر هاجم زي الغول ..
وحاسب يا عم حاسب يا اخويا حاسب يا شقيق .. وده طبعا مش كلام الغفير لكن اغنيه شبرا من عند بتاع الكاسيت اللي انواره ملعلعه المكان .. وخاطفه عنين الفيومي اللي عمال يتلفت حواليه اكتر من التايهين .. ويمكن يشكك فيه امين شرطه غتت جنب العربيه الاتاري ومستني صيده..
وبصفارة العسكري هتعدي اربع قضبان هما كل النقله من الطريق السريع للحواري الضيقة واللخبطه اللي ملهاش اخر ..
من قهوة كل اللي فيها بيبحلق في دلع نانسي عجرم ..لبهايم راقدة في وسط الشارع وريحتها داخله علي اللي بيقلي بلح الشام علي الكبابجي علي بتاع الكشري علي بارفان انثي لوت رقاب كل شباب القهوة ناحيتها .. وهيجت كبت محاصرهم من اول صوره عاطف عبيد في التليفزيون لاغاني عمرو دياب لعمرو خالد بصوته اللي يفكرك بالعيال اللامواخذه ..
ويمكن تتشنكل في عيل بس كل همه يخطف عقب سيجارة قبل ما تدوسه الرجلين .. وبيحسد العيال اللي تحت اخر عمود قرب المزلقان بيشموا الكله ..
واوعى تدخل في قلب زفه الصعايدة اللي مرشوشين في المنطقة .. زيح ونظرات شر وشنبات واكتاف عريضه وعريس زي الفار المبلول .. وتعب عامل زي تعب الست الحامل اللي طالعه روحها مع كل سلمه من سلالم مركز المنيب الحضري الطبي.. ومن صوت ضرب النار لصوت الشيخ بيزعق في محل تاني :
- مبتصليش ليه ؟
وتاني تسمع شبرا وبنات شبرا .. ومن نور المحلات لنور العربيات لنور التليفزيونات لضلمه البلكونات وعتبات البيوت اللي مرشقه ستات بتشم هوا ربنا وبتطلع خنقه طابقه علي الضلوع والروح .. لغايه ما توصل لنور عيون بنت سبعتاشر اللي فارده الجذع ورافعه الصدر وخطوتها اسرع من زحف امها اللي في حجم الفيل وابوها بنفسه المكروش ..وجايز تلمح الراجل العجوز اللي مقرفص وقافل عينه عن كل الدنيا وسابح في ملكوت تاني ..
ولو جعت واكيد هتجوع من كتر محلات الاكل وبتوع الخضار لبتوع الفاكهه لبتوع الحلويات .. واكل اكل اكل ..وابقاق مفتوحه بتكمل بابقاق السواقين اللي نازلين سب دين يمين وشمال .. ومع كلام محمد حسان عن وفاة الرسول نازلين برضه استغفار شمال ويمين ..وجايز تلمح بتاع الجرايد المدفون بين المقلة والجزار ..واللي فاتح عينه نص فتحه كأنه علي قد حجم الكشك وصدقني بيفرز اللي جاي ومتوقع الخلقه اللي جايه تنفع تقرا ايه ..وزي كل مكان هتلاقي بتوع المحمول واتكلم براحتك ..ولو حبيت تتصور هتلاقي مصوراتي الرمال الناعمه ..ويمكن تلاقي شله جلاليب طالعه مليانه بفرحه عيد.. او تشوف البنت اللي داخله لابسه بلوزه صاحبتها وحاطه من كحل اختها ومزوده الروج اللي مدكنه تمنه من فلوس الدرس وفارده شعرها الطويل واللي اسود من لون الجيبه الضيقه ..بس نصيحه بص وبلاش لسانك يتهور .. وإلا شوم ومطاوي وشباب فجأة يطلع من تحت الأرض .. وشر ينضح من تحت الجلد .. وهيه نفس اللمه رايحه خناقه ولا فرح مش فارقه .. وبنفس حماس التعليم بالمطواه علي وش بني آدم تلاقيه بيرقص بقزازه البيره ويطلب السلام لأجدع شباب
شباب المنيب
وسلام لاجدع مزلقان
ورقصني يا نجم .
أشرف نصر

حياتنا سيناريو لافلامنا

نص عامية : أشرف نصر
علشان اللي أمها المملة أخرتها تلحق تقعد ..أو اللي لسه رافض يدفع للبلاسير البقشيش الإجباري يلحق يفهم .. لازم بدايات أفلامنا تكون طبعا هاديه .. ومن علي راس الشارع والناس بتقول
" صباح الخير .. نهارك فل .. ازي الحال .. إيه الأخبار "
لغاية الشقة ولحد الأوضه اللي فيها ايد البطل تتمد من تحت الغطا وتخرس المنبه ..
برضه حياتنا هاديه ..
السبت زي التلات زي الخميس .. بنقابل نفس الوشوش الجامدة ونفس الابتسامة الصفرا .. ونضحك علي نفس النكت البايخة ونتخانق لنفس الأسباب .. علشان نرجع نتصالح بنفس البساطه ..وعلشان الناس دافعه فلوس لازم بطل الفيلم يحب البطلة .. ولابد يسبل لها وتحن عليه في الكازينو أو علي كوبري قصر النيل ..وعلي طول ننبسط لأنها شبه قعدتنا .. ويمكن نفس كلامنا .. ورعشه ايدينا .. ونظرة العين اللي بتلف في كل الاتجاهات ستين لفه في الثانيه من خوف مجهول .. وتتساوي ساعتها أماكن قعدتنا .. صدفه ولا شبرا أو حتى نادي الشبان قرب سواقي الفيوم .. وحافظين في السينما مبررات البطل عن الظروف اللي مخليه المحروس عاجز عن تحقيق حلم حبيبته .. ونسمع صم كلمات الهانم الأنثى المسكينة قدام ضغوط أمها والبنات اللي في سنها .. لذلك هتكون كلماتنا في ساعات الوداع مكررة ..ودموعنا باهته .. ومشاعرنا أبرد من الحاجه الساقعه اللي فنجرنا بيها لاخر مره علي حبيباتنا ..
وتتأزم الأحداث طبعا في الفيلم ..وتموت الأم من غير دوا والبطل بعد ما يغني علي طول يحلف انه هيكون اغني من كل الناس ..وفجأة احنا كمان تتدربك حوالينا الدنيا .. ونلاقي نفسنا في لحظه
" دخلنا علي التلاتين ومعملناش حاجه "
ساعتها هيصرخ واحد فينا
" حياتنا سيناريو رديء لفيلم عربي فاشل "
فنضحك بعزم ما فينا مش علي اكتشاف حضرته .. لكن ببساطه انه اتاخر قوي في الفهم .. وبدون مبررات نلاقي الصاحب في الفيلم خان البطل المسكين .. والصاحبه خطفت جوز البطلة الحزينة .. والبواب سرق الشقة .. والمأذون ببساطه نصاب .. ولنفس المبررات المعدومة نلاقي في حياتنا .. أصحابنا بقوا بوشين فنقرر نكون بتلاته .. ونفرح من جوانا لو مسكنا عليهم لحظه ضعف .. ولو في يوم حاولنا نكسر لوح التلج قوام نتريق علي بعض فتموت آخر لحظه ممكن نحكى فيها لبعض .. وفي السينما ننام ونقوم وندخل الحمام لا مؤاخذة نتبول إعجابا طبعا بالفيلم اللي حياته براح ووقته طويل أطول من طول الصبر .. ونرجع نلحق النهاية السعيدة برجوع المحروس للهانم .. وبالبنط العريض تتكتب النهاية .. علي طول ننفخ ونقول يااااه ..واول ما نخرج والغريبه ساعتها بنداري عننينا من النور نحلم تكون نهايتنا الجنة .. اصلنا طبعا بنحب كل نهايه سعيدة ..
لكن يمكن واحد فينا يتجنن او يعقل ويقرر يكتب هو لنفسه
كلمه

The End
ساعتها هتثور السينما
وتتلخبط حياتنا
واحنا كلنا بنفكر في ابن الكلب اللي عملها
وخرج عن النص .
أشرف نصر

Jul 8, 2007

23يوليو ..الحلم والكابوس



من 52 إلي 2007 مرت 55 سنة علي نظام حكم العسكر في مصر ..كان تحرك الجيش حلما جميلا عاشته مصر بحثا
عن مخلص ينقذها من حكم ملكي عانت منه مصر طويلا ..لكن الآن وبعد أن جرت في النهر مياها كثيرة وتعكرت أمواجه وصار النيل بقعة آسنة من الفساد والظلم والديكتاتورية ..لم يعد الحلم سوي كابوس نحلم بالخلاص منه ..قد نتفق أو نختلف حول حكام مصر بعد 23 يوليو لكن غالبا سنتفق أن الحلقات التالية للحكام هي نفسها لم تتغير

فمن دخلوا الاتحاد الاشتراكي سارعوا بدخول حزب مصر وهرولوا سريعا للحزب الوطني

هؤلاء هم الخطر الحقيقي فقد زادت عبر ال55سنة اعدادهم حتي أصبحوا راسخين في الفساد والاحتكار وامتصاص دماء المصريين ..في رأيي ان خطيئة المصريين كانت انهم فرحوا لما حدث في 23 يوليو ثم عادوا لبيوتهم تاركين ما لقيصر لقيصر ..إنقاذ مصر لن يكون فقط بالتخلص من مبارك والدائرة الصغيرة حوله ..لكن الأهم هو التخلص من تلك الحلقات المتشعبة من أصحاب المصالح ومن يلعبون علي كل الحبال ..لكي لا نجدهم في أول صفوف لاعني نظام مبارك بعد سقوطه وأول المهللين لمن يليه ..وليبقي الحلم عظيما يجب أن يكون التغيير سلميا شعبيا

لا علاقة له بالعسكر ودباباتهم

فهل يتحقق الحلم

أم هو من أضغاث الأحلام

أشرف نصر
الصورة من : www.egyptiantalks.org

Jul 4, 2007

عباقرة المناهج يشوهون رائعة طه حسين


في حلقة من برنامج المنتدي علي قناة النيل الثقافية ..طرحت فضيحة حذف عباقرة تأليف مناهج الثانوية فقرات من كتاب الأيام للعظيم طه حسين ..المصيبة كانت في كمية المتصلين بالبرنامج من حاملي أ.د
"طبعا عددهم في مصر ف الليمون "
وكلهم يدافعون عن أصحاب الفضيحة ..هل يتخيل احد أن تتهم كلمات طه حسين بافساد الاولاد ونشر الفقرات المحذوفة سوف يؤدي للانحلال الاخلاقي وحب الخمر وتشويه صورة المشايخ
كل حماه الاخلاق والاوصياء المتعصبين هؤلاء لا يدركون الفارق بين
من يكتب عن نماذج بشرية بها "العيوب "وبين من يروج "للقبائح "..من جعل هؤلاء
أوصياء علي عقولنا شباب عمره 17 سنة يفهم في الحياة أكثر ألف مرة منهم
ومن واضعي المناهج الذين لا يشغلهم سوي اتباع التعليمات وقبض المكافآت التي يتقاتلون عليها ..
أما أخوانا "ا.د"فهم نتاج مأساة كيفية منح الدرجات العلمية ومأساة تهافت انتاجهم
"حرام يطلق عليها رسائل "
المأساة الأكبر في تزايد أوصياء الفضيلة وحماة الأخلاق ومن يرون الناس لا يعرفون صالحهم ولابد أن نخفي ونظهر ما نريد بالكيفية التي نريدها
الناس دول عاوزينا نندم أننا طالبنا بتدريس أعمال كبار مفكرينا ومبدعينا
ارتحتوا خلاص هنقول الغوا تدريسه
بس بلاش تدرسوه مشوه
علي أيدي أقزام
لا يعرفون من هو طه حسين
أشرف نصر
الصورة من : www.alahd.com