Dec 18, 2006

شخبطة

بصوا بقي
من غير رغي او فزلكة او طنطنه ..الموضوع معايا مش جديد..ناس تشوفها وتبدأ بالسلام ..والتعارف ..ويتسرسب بينكم كلام ..وبدون ما تاخد بالك تتورط وتصدق وتتواعدوا وتتفقوا وتتبادلوا الارقام والكتب والاهم منها الحكايات ..
فجأة تكتشف يا مؤمن ..ان تاريخك اتنطور ف شويه حكايات مبتورة من غير ما تاخد بالك ..او حزرك او حتي ترش مكياج علي روحك ..تلاقيك عارض ع الناس خرابيشك ..
ومش فاكر قوي كلمة امل لكنها تقريبا كده :
رفسة من فرس
تركت في الجبين شجا
وعلمت القلب ان يحترس
لكن حاول مهما تحاول ..
برضه هتفلت منك كلمة ف حدوتة يا مسكين
وتطلع ولو حتى ضحكة سازجة علي كلمة فارغة ..بس ساعتها هتكون ضحكة بجد ..تخيل
ويا غلبان تتكعبل وتتكلم ..واول ما الكلمة تطلع تطلع ملانه بتراب بلدك علي كلمتين من كتبك علي شمس العاصمة السخيفة وانت ف عز اغسطس وشايل حواديتك ودايخ علي حته عنوان ..
ساكت :متعمد
دمي تقيل : امركوا لله
مغرور : ابدا خالص
بس احتمال
مجنون : ده انا متأكد منه
بس استني استني مش يمكن كلهم زيك
وبيداروا ع الحاجات والمحتاجات
بالضحكات والتنظيرات والحوارات والمساجلات والكلكعات وكل اللي بيخلص بال ات ات
هوه فيه آت
برضه ممكن
كل حاجة فيك يا دنيا ممكن
وف مصر بالتحديد
الاكيد والمستحيل برضه ممكن
دول حتي ممكن يندموا ..لما قالوا اتكلم
وهيقولوا كلمة تصبح بعدها مثل :
سكت كتيييييييييييييييييييييييير
واتكلم شخبطة
بس
إنما مفيش خلاص
أشرف سوهاج 14/12/2006
ملحوظة :حرف الزال بايظ
يلا بقي
سلام

Dec 6, 2006

صباح الفل



يخرب عقلك يا شريف يا بنداري علي فيلمك صباح الفل
مثال ممتاز للفيلم القصير
المفروض اقعد انظر واقول علي سبب اعجابي
لكن الفيلم ما يتحكيش لبساطته الشديدة المهم مشاهدته
وجميلة هند صبري "لما تمثل "بس خلاص
أشرف

مهرجان القاهرة للسينما المستقلة

عقد المهرجان بالتاون هاوس بالقاهرة
الفكرة ممتازة وخاصة علي هامش مهرجان القاهرة السينمائي الدولي
ونحتاج الي :1- تقليل التكريم في الدورات القادمة ليحتفظ بقيمته
طبعا الاهم يتكرر
2- منح جوائز عبر آراء الجمهور
3- الدقة في المواعيد ومحاولة البحث عن مشاركات اكثر من الخارج
عارف انها لسه الدورة الاولي
لكن الحماس لفكرة ممتازة هو سبب الطموح الاكبر
أشرف

Oct 28, 2006

كفاية بقي يا مصر



ارحمينا
تعبنا
اتخنقنا
كفرنا
امتي نحس ان الحرية
مش وهم
مش خرافة
صحيح انني رايت
بعض الامل
في حركة كفاية
لكن بوادر الخلافات
:تجعلني اصرخ
خايف علي كفاية
مرعوب عليكي يا مصر
أشرف

بعد العيد

مر العيد كما مر رمضان قبله بلا طعم
بلا بهجة
رغم محاولاتي لاستحضار الرضا القديم والفرحة التي كانت
بلا جدوي
حزني ليس حزن الشعراء
وشجني ليس شجن الرومانسيين
فقد فقد حلقي نبل الشجن
ومرارة الحزن
تغيرت بلدتي
وتغير أهلي
وتغيرالأصدقاء
وبالتاكيد تغيرت انا قبلهم
كان هناك ثمة امل وحيد
ان تمطر
لكن السماء كانت
جافة تماما
مثلي
أشرف

Oct 13, 2006

اسمي أحمر



أشعر بفرحة طاغية لفوز أورهان باموق بجائزة نوبل
فتنت بروايته الرائعة اسمي احمر
وتعرفت علي الكاتب بقراءة "القلعة البيضاء "وبعض المقاطع المنشورة للكاتب في اخبار الادب
لكن اسمي احمر عبر بنائها وشخصياتها وعالمها التاريخي الفاتن
وتطويع اللغة لدرجة الاحساس باللون وكأنك تلمسه وتشمه وتتماهي معه
ظلت عشقا خاصا
أعرف ان ماكينات التشكيك الثانوية في نوبل ستنطلق
للتشكيك في اهداف الجائزة او التوقيت وربما الطعن في الكاتب نفسه
وللاسف يكون اغلب التشكيك من عالمنا العربي المعظم
لكن علي مسئوليتي قراءة اسمي احمر فقط
ستجعلك تثق ان نوبل هي التي فازت بباموق
كما فازت بماركيز ونجيب محفوظ
مبروك يا باموق
من شخص لا تعرفه
لكنه يعشق تحفتك
أشرف

Sep 30, 2006

عم نجيب محفوظ



يبدو أن الفضفضة ستكون مسيطرة بعض الوقت
المهم انه حدث لي شيء غريب معي
كنت امر باكتئاب "طبعا ليس هو الشيء الغريب "انما
وجدت نفسي اعيد قراءة كل ما عندي من كتب عم نجيب محفوظ
وبين الروايات الكثيرة التي ابدعها الرجل
قرأت" ليالي الف ليلة" مرة أخري
وجدت نفسي استعيد بعضا من البهجة التي نسيتها
وجدتني احس انني عشت فترة علاج مع طبيب نفسي أو متصوف كبير
او ربما ساحر
لا اعرف اي علاقة مباشرة بين الرواية العظيمة وحالة استعادة التوازن التي حدثت لي
لكن الروح !!!!!!!!!!روح عم نجيب او روح هده الرواية بالتحديد
لا اعرف
أشرف
ملحوظة: كانت الحكاية اثناء حياة المبدع العظيم
ملحوظة ثانية:من قال ان مثل نجيب محفوظ يموت
سلام
أشرف
الصورة من : www.shreet.com

Sep 26, 2006

شاب بعد الثلاثين

لما وصلت لسن الثلاثين قلت
كتير قوي تلاتين دي
لكن وماله
اديني بعد التلاتين بعمل مدونه
اللي اكيد في اطفال "هايلين"بيعملوها بدري قوي عن كده
عموما يموت الزمار وصوابعه بتتعلم
أشرف
ملحوظة هامة :
المدونة عن السينما والادب وشويه سياسة
بس التلاتين " منها لله "فرضت نفسها
سلام