Mar 21, 2011

ارتكاريا

ادعي عليك بإيه يا هيكل من ساعة ما اتكلم عن حكاية الثورة المضادة والناس بقت بتكوبس بيها

صحيح فيه ناس مش طايقة الثورة وبتحاربها ..عارفين ..لكن بتلووش ولا منظمين ولا نيلة

بالعكس كل واحد فيهم بيحاول يخلع قبل رجله ما تيجي وبيغرق الباقين

لاحظ مثلا فى التحقيق مع يوسف والي وسامح فهمي كله بيرمي على مبارك مش بيدافع عنه ولا عاوز يرجعه لا هوه ولا اولاده

وشوف مثلا مصطفي الفقي وجابر عصفور فيران السفينة اللي نطوا بسرعة وغيروا الموجة

ولا العادلي اللي بيرمي على مساعديه ومساعديه بيرموا عليه

...

ومش عارف مين ابن الحلال اللي طلع مصطلح : فلول الحزب الوطني

لحد ما الناس بقت فاكرة انهم هيلاقوا بتوع الحزب بيجروا ف الشارع بهدوم مقطعة وبتحدفهم بالطوب

فلول ايه بس ؟ماهم مالين الدواير الانتخابية بفلوسهم وعائلاتهم وبلطجيتهم

...

وحد تاني او تالت بعد الاستفتاء طلع بكلمة :لازم نوعي الناس

يا اخوانا حرام عليكم انا صحتي علي قدي ومرراتي ما بتتحملش كده

ناس مين اللي توعوهم بس

انتم اخترعتوا الوهم وصدقتوه

مين قال ان اللي قالوا نعم فى الاستفتاء كلهم تيارات اسلامية او مضحوك عليهم

..تصدق وتؤمن بكام

انا قلت لأ فى الاستفتاء واخويا اللي زيي لا بيركعها ولا فلول حزب وطني ولا محتاج حد يوعيه وقال نعم

ايه المشكلة

المهم اننا احنا الاتنين نزلنا وشاركنا وبكره كل واحد فينا يعرف كان صح ولا غلط وينزل تاني وتالت

الحسبة كده: ناس مستعجلة على حل وناس باصة لقدام

لكن لا الاوليين خافوا من حملة التكفير التافهة بتاعة الاخوان والسلفيين ولا التانيين بس هم المخلصين اللي بيدافعوا عن الثورة وسمعوا تخويفات الكنيسة

الأهم من ده كله ان الشعب لما عمل الثورة لا كان مستني احزاب ولا توعية ولا تنظير وفذلكة

لكن كل واحد حسبها بطريقته وشاف ان نظام مبارك ده لازم يغووووووور

...

وحياة الست ام كلثوم عندكم وانا بحلفكم بالغالية اهوه

اهدوا وركزوا فى اللي جايي

ما تنسوش ان احداث الثورة كانت مولعة فى السويس والقاهرة واسكندرية وكان فيه محافظات تانية عايشة مع مدحت صالح فى كوكب تاني

وبرضه مش عاوز اظلم باقي المحافظات

لكن قصدي ان اللي بيعمل الثورة مش الشعب كله

لكن مجموعة من الناس

انما انتخابات وتصويت وحركات موضوع تاني خالص

وحياة كوكب الشرق تاني

بلاش حكاية المصطلحات اللي بتتحول ل لبانة ف بقنا دي

احسن بتفكرني بافتكاسات صفوت الشريف الله يحرقه بقى

منظومة – ازهي عصور الديمقراطية – انتخابات نزيهة

ولا قاموس برامج التليفزيون: اجندات – عملاء – عناصر مندسة

بس خلاص

واد عمكم

أشرف

http://ashrafnasr.blogspot.com/

من محاسن الصدف


وجدت قصة "خيط إبرة" وقد "كانت القصة الثانية التي تنشر لي على الإطلاق"كانت قد نشرتها مجلة أدب ونقد – قبل انتشار الانترنت – ضمن أرشيف الكتروني للأعداد القديمة للمجلة

ووجدت سيناريو فيلم روائي قصير"أنس"كان مشروع السنة الثالثة بالمعهد

– كان قد نشر نصفه لظروف المساحة الورقية – فى مجلة تواصل ،نشر كاملا على موقع الكاتبة نجلاء محرم التي تصدر المجلة

ووجدت تدوينة قديمة كتبتها وكانت عن طه حسين - والطريف أنها كانت بالعامية- وقد ترجمت للإنجليزية ووضعت

على أكثر من موقع ومعها رابط المدونة ولا أعرف ابن الحلال الذي ترجمها

كما وجدت روايتي الأولي موجودة ضمن قائمة كتب مكتبة الإسكندرية

والرواية الثانية ضمن قائمة كتب جامعة ميتشجان فى أمريكا

ولا أعرف كيف وصلت الروايات لهذه المكتبات

الخلاصة:أكتب يا ولدي

لا شيء يضيع

يعيش جوجل والمجد للإنترنت

:)

أشرف نصر

http://ashrafnasr.blogspot.com/

Mar 7, 2011

بسرعة


لا تنسوا المصريين فى ليبيا ووضعهم المأساوي فى مواجهة تحريض المجنون القذافي

ولا تنسوا شكر ودعم شرفاء تونس وموقفهم الرائع لكن الوضع أكبر من قدراتهم

لا تنسوا جرحي الثورة وضرورة تسفير من يحتاج للعلاج بالخارج

لا تنسوا علاج آثار كارثة حرق كنيسة أطفيح

لا تنسوا رفع الحصار الظالم عن أهلنا فى غزة خاصة والمنع يشمل المرضي المحتاجين للعلاج

لا تنسوا عمال اليومية والفقراء فى هذه الظروف العصيبة

لا تنسوا التعديلات الدستورية يوم 19 وما موقفنا منها

أرجوكم لا تحتفلوا الآن ولا تجعلوا شهوة متابعة فضائح أوراق أمن الدولة

تنسينا المهام الجسيمة

نحتاج

Brainstorming عصف ذهني

لوضع حلول سريعة

http://ashrafnasr.blogspot.com/

Mar 6, 2011

ورق أمن الدولة

سقطت قلاع الظلم المسماة مباحث أمن الدولة

ولكن

ذهبت السكرة وجاءت الفكرة

الناس تنشر ما وجدوه من أوراق على الانترنت

بس كلمة بهدوء

1- كلنا عارفين إنهم خبراء فى عمل تقارير ظالمة وملفقة للأبرياء

ألا يعد نشرها ظلم مرة أخري بعد ظلم المباحث

2- الناس تميل للفضائح الشخصية لذلك الأعلى مبيعا قريبا جدا سيكون

جرائد الفضائح ومواقع النميمة

3- المنشور حتى الآن له علاقة بالصحفيين والمذيعين وأنا مع كشف كذب المنافق فيهم

لكن مش عن طريق ورق أمن الدولة

وخصوصا إننا شعب بيفرز ومش مستني حد يدله مين كداب وفاسد ومنافق ومين شريف

4- مين يضمن أي ورقة انها كانت هناك ومش مضروبة

5- الأهم فى رأيي الورق اللي اتفرم واتحرق

أكيد هو الأخطر لأنه عن الفاسدين فى النظام السابق

6- كمان هناك رأي إن بعض الورق يتعلق بشبكات تجسس أو إرهاب أو غيره

من القضايا الخطر على أمن مصر بجد

مين يضمن عدم تسريبه والكل عاوز يعمل فيه صاحب ويكيليكس

7- الايميلات الشخصية للناس العاديين وجدت كلمات سرها فى ملف هناك

لذلك بسرعة أرجوك غير كلمة السر المتعلقة بايميلك

..

الحل فى رأيي تشكيل لجنة من قضاة مشهود لهم بالنزاهة والكفاءة وتسليم الورق لهم

وتكون لجنة تحقيق لها كل الصلاحيات للحكم على

تقييم الورق : هل قضايا فساد يجب فورا معاقبة المتورط فيها

أم تفاصيل شخصية للناس يجب استبعادها

أم تقارير مفبركة أدت لسجن وتشريد الملايين يجب تعويضهم

..

تحيا مصر

http://ashrafnasr.blogspot.com/

Mar 5, 2011

كان فيه وخلص



إلى أهلي وناسي

وهتكلم بدون تشنج او تخوين

وأقصد الناس اللي صرخت : آي آي حرمنا

بسبب لوى الدراع اللي بتعمله الشرطة فى عدم نزولها

واللي حله اننا نستعين بوزير داخلية اسمه :لواء احمد رشدي

ونفتكر ازاي كان بيعاملهم وفى نفس الوقت كان فارض هيبتهم فى الشارع

اهلي وناسي اللي اول الكاميرا ما تيجي عليهم يصرخوا:

عاوزين نرجع ننتج عاوزين الشرطة ترجع ونحس بالأمان

طيب بيني وبينكم

هو احنا كنا بننتج؟! ركز وافتكر سواء كنت عامل أو فلاح او طبيب أو فنان الخ

تحبوا أفكركم كام مصنع اتباع بالبخس وكام واحد اتشردوا الخ

كنا حاسين بالأمان!

تحبوا افكركم بصفحات الحوادث وبرامج التوك شو

كام جريمة بلطجة

وكام مرة حصل شغب جماعي

وازاي اصبح شعار الناس

خد حقك بدراعك

اللي فاكرين اننا هنرجع زي الأول

آسف جدا

كان فيه وخلص !

طيب رايحين على فين

اللي هيحدد ده تصرفاتنا كلنا

وإنما مفيش رجوع يا سادة!

أشرف نصر

http://ashrafnasr.blogspot.com/