Mar 21, 2011

ارتكاريا

ادعي عليك بإيه يا هيكل من ساعة ما اتكلم عن حكاية الثورة المضادة والناس بقت بتكوبس بيها

صحيح فيه ناس مش طايقة الثورة وبتحاربها ..عارفين ..لكن بتلووش ولا منظمين ولا نيلة

بالعكس كل واحد فيهم بيحاول يخلع قبل رجله ما تيجي وبيغرق الباقين

لاحظ مثلا فى التحقيق مع يوسف والي وسامح فهمي كله بيرمي على مبارك مش بيدافع عنه ولا عاوز يرجعه لا هوه ولا اولاده

وشوف مثلا مصطفي الفقي وجابر عصفور فيران السفينة اللي نطوا بسرعة وغيروا الموجة

ولا العادلي اللي بيرمي على مساعديه ومساعديه بيرموا عليه

...

ومش عارف مين ابن الحلال اللي طلع مصطلح : فلول الحزب الوطني

لحد ما الناس بقت فاكرة انهم هيلاقوا بتوع الحزب بيجروا ف الشارع بهدوم مقطعة وبتحدفهم بالطوب

فلول ايه بس ؟ماهم مالين الدواير الانتخابية بفلوسهم وعائلاتهم وبلطجيتهم

...

وحد تاني او تالت بعد الاستفتاء طلع بكلمة :لازم نوعي الناس

يا اخوانا حرام عليكم انا صحتي علي قدي ومرراتي ما بتتحملش كده

ناس مين اللي توعوهم بس

انتم اخترعتوا الوهم وصدقتوه

مين قال ان اللي قالوا نعم فى الاستفتاء كلهم تيارات اسلامية او مضحوك عليهم

..تصدق وتؤمن بكام

انا قلت لأ فى الاستفتاء واخويا اللي زيي لا بيركعها ولا فلول حزب وطني ولا محتاج حد يوعيه وقال نعم

ايه المشكلة

المهم اننا احنا الاتنين نزلنا وشاركنا وبكره كل واحد فينا يعرف كان صح ولا غلط وينزل تاني وتالت

الحسبة كده: ناس مستعجلة على حل وناس باصة لقدام

لكن لا الاوليين خافوا من حملة التكفير التافهة بتاعة الاخوان والسلفيين ولا التانيين بس هم المخلصين اللي بيدافعوا عن الثورة وسمعوا تخويفات الكنيسة

الأهم من ده كله ان الشعب لما عمل الثورة لا كان مستني احزاب ولا توعية ولا تنظير وفذلكة

لكن كل واحد حسبها بطريقته وشاف ان نظام مبارك ده لازم يغووووووور

...

وحياة الست ام كلثوم عندكم وانا بحلفكم بالغالية اهوه

اهدوا وركزوا فى اللي جايي

ما تنسوش ان احداث الثورة كانت مولعة فى السويس والقاهرة واسكندرية وكان فيه محافظات تانية عايشة مع مدحت صالح فى كوكب تاني

وبرضه مش عاوز اظلم باقي المحافظات

لكن قصدي ان اللي بيعمل الثورة مش الشعب كله

لكن مجموعة من الناس

انما انتخابات وتصويت وحركات موضوع تاني خالص

وحياة كوكب الشرق تاني

بلاش حكاية المصطلحات اللي بتتحول ل لبانة ف بقنا دي

احسن بتفكرني بافتكاسات صفوت الشريف الله يحرقه بقى

منظومة – ازهي عصور الديمقراطية – انتخابات نزيهة

ولا قاموس برامج التليفزيون: اجندات – عملاء – عناصر مندسة

بس خلاص

واد عمكم

أشرف

http://ashrafnasr.blogspot.com/

No comments: