Feb 2, 2012

شارع محمد محمود (تاني)-شهادة

الظاهر مكتوب علينا كل حاجة تتكرر سواء الثورة أو حوادث شوارعها زي موقعة محمد محمود
المهم ده اللي حصل فى شارع محمد محمود(اللي شفته) بالظبط
الساعة حوالي 5 أو 5 وربع دخلت التحرير لقيت عم كمال خليل واقف لوحده
بدون سلام ولا كلام (الراجل ما يعرفنيش اصلا) سألته: طنطاوي هيعمل فينا إيه تاني؟ رد علي بكلمة واحدة:اصبر
بعدها شفت مسيرة الألتراس فى اتجاه ميدان باب اللوق
رحت هناك لقيتهم دخلوا يمين بموازاة الجامعة الأمريكية ومشيت وياهم لحد المسيرة ما وقفت قدام مدرسة الفرير
هناك سلك شائك وعساكر أمن مركزي واقفة وراه
وقفت المسيرة بينها وبين العساكر فقط السلك وما اتحدش طوبة ! كل اللي اترمي للعساكر بعض الجرايد (يمكن يفهموا سبب المسيرة وغضب الناس) وبدأ الشباب فى الهتاف ضد الداخلية والعسكر والمشير
وبعدها صلوا صلاة الغائب على الشهداء
جه شاب قال: يا شباب كلنا رايحين محمد محمود ومش عاوزين نسيب حد هنا
قالوا : هنصلي المغرب الأول
وفعلا أذن واحد منهم وصلوا المغرب ودعوا على قتلة شهداء مصر والألتراس اللي سقطوا فى بورسعيد
وبعدها رجعوا للهتاف تاني وكل شوية حد يرفع صوته وينبه على الباقيين : محدش يرمي طوبة
ولقيت شاب معاه يافطة فيها كلمة ناقصة حرف فصلحتها بالقلم ورجعتهاله(اللي فيه داء ميبطلوش !)و
بعدها اتحركنا على ش محمد محمود وهناك كبرت المسيرة
اتركز الهتاف للشهداء وضد طنطاوي وسامي عنان وحبيب العادلي! بدأ بعض القلق لما ظهر حد فوق عمارة سكنية والشباب وجهوا ليزر عليه وهتفوا ضد الداخلية لكن أكتر من صوت أكد انهم سكان وتحديدا ست واقفة
فى الفترة دي ولعوا شمروخين بالعدد واحد فى آخر المسيرة ناحية ناحية التحرير والتاني فى تقاطع محمد محمود مع ش منصور وما اتحدفوش على حد ولكن استخدموا لاشعال حماس الشباب اللي مكانش محتاج حاجة تزود حماسة خصوصا لما يتردد هتاف : اخويا مات امبارح وأنا مش هصالح
شباب الالتراس كانوا حاسمين الحكاية : العسكر بيقتلوهم علشان وقفوا مع ثوار التحرير
واكترها تكرار: شمال يمين ك...امك يا مشير
يمين شمال ك..امك يا عنان
اووووه اووووه اووو ..ك..ام حبيب العادلي بتاعكم
اخويا مات امبارح وأنا مش هتصالح
فضلت الهتافات شغالة لحد ما بان لنا إن فى الصفوف الأولى عربيات الأمن المركزي (عربيات الترحيلات الكبيرة)ظهرت فى المكان وبتتحرك وبعدها فجأة بدأت دوشة واتضح أن الداخلية رجعت ورا واتفتح طريق صغير للمرور ناحية الوزارة! بمجرد ما الشباب اتقدموا بدأ قنابل الغاز واحدة واحدة على خفيف
وبعدها زاد ضرب القنابل وتراجعنا بعد ما بدأ سقوط المصابين بالاختناقات من الغاز البشع
ظهر شباب الموتوسيكلات وبدأوا نقل المصابين
ولما اصبت باختناق ونفسي ضاق والقنابل نازلة علينا وتأثيرها لحد ميدان باب اللوق
واحنا بنجري دخلت الشارع الضيق اللي فيه السوق : جزار كان بيساعد الشباب برش الخل على المناديل
وساعدني كتر خيره
واضطريت ارجع ميدان التحرير وأقسم أني ما شتفتش ولا طوبة ولا سلاح من أي نوع مع الألتراس اللي كانوا كالعادة على قدر المسئولية ودفعوا وهيدفعوا التمن عن طيب خاطر
رجعت التحرير حوالي الساعة 7 ومشيت حوالي 7ونص وكانت عربيات الاسعاف ظهرت وبدأت تنقل المصابين ومجموعات من المتظاهرين بتهتف ضد العسكر
ورجعت أجواء موقعة محمد محمود!
الخميس 2 فبراير 2012
أشرف نصر
http://ashrafnasr.blogspot.com/

No comments: