Jan 23, 2007

انتحار واحد اعرفه

الولد بيقول عن نفسه انه رومانسي
ولما بيزعل منها بيسميها رومانسية سخيفة ..
الولد زى كل الناس بيردد ليل نهار كلمة انتحار وهانتحر ويرسم ألف سيناريو لظروف انتحاره..
ومن جواه كل دي ألاعيب وبخور بيطرد بيها الاحتمال من جواه..أصل الولد ببساطه مجنون بالدنيا
وبيعشق طراطيف طراطيف ملامحها ..
وكفاية عليه فيلم ولا رواية ولا مكالمة واحد صاحبه تطلع الضحك من جوه ضلوعه..
وتخلي حدوته الانتحار ومفارقة الدنيا مجرد بواخه وهتعدي..
وزى كل الناس يرجع يشاغب ويا الدنيا ويسب لها - طبعا في سره - مش قولنا مجنون بيها ..
وعلي طول يضحك ويجري ويزاحم ويبني علاقات غير اللي اتدربكت علي دماغ سعادته..
علي فكره الولد مش شرط مشاكله تكون عاطفية وحب ونهنهة بقي ومواويل – مع انه غرقان فيها – لكن أحيانا حاجات تانيه وفي نظر ناس تانيين الحاجات دي صغيرة وتافهة ..
وان سعادته مجرد واد طري ولازم يجمد بقي ..
ومع انه مصدق فعلا انه أطرى من اللازم ..
لكنه كمان مصدق إن الدنيا صعبه وابوخ من أي احتمال ..الولد طلباته كتير كتير كتير جدا من الدنيا ..
وفي نفس الوقت قليلة قليلة قليلة برضه .. ازاي !! ..اشرح لك ..
أصله عشمان فيها والعشمان طماع والطماع لابس نضاره مزهزهه كل الحاجات قدامه فتخليه عايز..
المحبوبة والكتابة والصحبة والأهل وشويه أوضاع سياسية تكون مظبوطه.. لكنه كمان بيرضي بأقل القليل منها ..
فلا عمره طلب مال ولا جاه ولا منصب – طبعا بدرجات –
لأ وحتى كل طلباته اللي فاتت مستعد إن حاجات تتلخبط فيها بس بشرط إن التانيه تكون مظبوطة ..
وهو ده العدل في نظره .. إنما أحيانا إن الدنيا تكون قفلت من كل النواحي زى الضمنه ..
لدرجه انه لما بيبعت اشاره استغاثة وحد من أصحابه بيستقبل الإشارة ..
اكتر حاجه بيطلبها الولد ساعتها إن الصاحب ميسألش :
- هو فيه ايه ؟!
جايز لأن الولد متعلمش يفضفض وجايز لأن فيه إحساس ملازمه إن أي مشكله مهما كبرت لما بيحكيها بتكون عبيطه عبيطه لدرجه تغيظه ..
وجايز اكتر لأن كل اللي محتاج له هو استقبال الإشارة من اللي حواليه ..
أما المشاكل فأكيد الدنيا اللي بينها وبينه كل العشم ده هتعديها له ..
الولد أنا عارفه ومقدر حكاية عشقه للدنيا .. لكنه أحيانا يجنني بأفعاله ..
علشان كده بيجينى إحساس انه ممكن يعملها ويريح نفسه وينتحر ..
بس ساعتها هيكون بقاله فتره ما بيجبش سيرة الموت .. رغم انه هيكون ما بيبطلش تفكير فيه ..
وساعتها هيكفر لحظه بحكاية عشقه للدنيا ..
وهيشوف إن مفيش جدوى من لعبه الإستغاثه بالأصحاب..
فيروح مبطل تفكير لحظه ويعملها ..
جايز جداً
.

No comments: