المنتخب المصري ..بهجة وفخر وإستغلال ودروشة

فاز منتخب مصر بكأس الأمم الأفريقية للمرة الثانية على التوالى والسادسة فى تاريخه وهى الأغلي فعلا لأنها جاءت بعد أداء رائع ومجهود عظيم وروح تفوقت على عشرات المواهب وملايين الدولارات فى المنتخبات الأخرى وبعدها

انفجرت البهجة فى قلوبنا وأحسسنا جميعا بالفخر ..ومنذ فترة طويلة لم نرى حب مصر والفخر بها فى معظم الدول العربية الأخرى التى رأت أنها فازت بالكأس معنا ..ودائما أقول مصر تعشق من يحبها

أجمل ملاحظة غير الخروج فى الشوارع والكلاكسات والرقص والغناء كان علم مصر الذى اصبح علي كل بيت وفي كل يد وعلي كل مكان ..يااااااااااااااااه ما أجمل صور الناس وهى تحمل علم مصر

لكن للأسف أسوأ ملاحظتين هما: استغلال الحكومة ومبارك وولي العهد (سي جمال )وشقيقه (سي علاء) للحدث من أجل ركوب الموجة وتلميع صورهم المقيتة في نظر الناس ..بالنسبة لي لما المطربين وبتوع الاعلانات يستغلوا الفوز لترويج بضاعتهم كلها بقع هتطلع مع الوقت ومش هيفضل الا الغنوة الحلوة مش السبوبة ..إنما الحكومة ولا ميه النار تنفع تنظف اثرها

الملاحظة الثانية: حالة الدروشة الغريبة ونغمة أن لولا اللاعبين كانوا بيصلوا مكانوش فازوا ..المصيبة ان واحد زي عصام عبد المنعم كتب امبارح عمود مستفز بدأه ( الحمد لله الذى صدق وعده ونصر عبده ) وكأن اللاعبين كانوا في معركة بدر قدام أبو لهب وأبو جهل ..طيب لو كده كنا بعتنا مشايخ من الأزهر يلاعبوهم ..وطيب ما فيه فرق بتغلبنا هل لأننا كفار ساعتها ..واحنا ياما غلبنا مسلمين ..كل اللي ناقص يقولوا الملايكة كانت بتلعب مع مصر وبتجيب الاجوان

حرام تضيعوا مجهود اللاعبين اللي طفحوا الدم اكتر من شهر علشان يفوزوا ..حرام تستغلوا الدين وترخصوه كده

ألف مبروك لمصر

ومنكم لله يا من تشوهون فرحة لم نشهدها من فترة طويلة

اشرف نصر