Dec 7, 2007

بلد محتقن حتي مع جوزيه


دلوقتي فاتت ساعات قليلة من وقت تصريحات جوزيه اللي رد فيها علي هجوم اتنين صحفيين بهجوم أعنف منه ..الدنيا ولعت في مصر ..والسيناريو اياه بتاع كل مشاكلنا بدأ ..الصحفيين هاجوا ضده ..وجمهور الأهلي طبعا وقف معاه ..الحقيقة ان هجوم الصحفيين الاولاني فيه جزء من الحقيقة زي ما كلامه تحديدا عن مشاكل اسلوب تدريب الناشيئن في مصر برضه حقيقي لكن محدش هيركز للأسف في (طيب نعمل ايه ؟؟؟؟؟؟؟؟؟؟؟؟) لكن الكل هيركز علي الشكل العام يعني : جمهور الاهلي بيشوف انها مؤامرة ضده من الناس الوحشين اللي بيكرهوا الاهلي ..والصحفيين بيشوفوا انه راجل مغرور وبيسيء لسمعة الصحافة المصرية ولسمعة مصر بالمرة ..جوزيه مش فاهم أزمتنا وهي حكاية الاسطوانة المشروخة : -احنا بلد ظروفه محتقنة ..
-يعني ايه يا اخوانا ..
-يعني بلاش تهاجم حد يا عم الخواجة الحاج علشان الفتنة الطائفية ..
وانتوا يا بتوع الجرايد ..البلد مش ناقص ..خفوا ع الراجل ..
طبعا ده هيكون كلام المسئول الأمني الكبير اللي هيجمعهم ف مكتبهم لشرب الشاي وأكل حته جاتوه ..
وبعدها يتصورا ف صورة وتنزل معاها اغنية :
الصلح خير قوم نتصالح ده الصلح خير
..لكن لا حد هيفكر ف كلام الصحفيين ان الراجل بيعتمد سياسة شرا العبد ولا تربيته ..ولا في منطق جويه وان الراجل معاه حق ف ان سياسة تدريب الناشئين عندنا خربانه لا فيها مدرب احمال ولا طبيب تغذية ولا طبيب نفسي علشان العيال في مرحلة بلوغ ..وننام يومين تلاته والأمن مستتب لحد مشكلة جديدة ..
أما لو تأخر المسئول الأمتي في اجتماع الشاي والجاتوة مش بعيد
ان الصحفيين وجماهير الزمالك ( اللي ناله من هجوم الراجل نايب ) انهم يرفعوا قضية لتفريق جوزيه عن زوجته لأنه مرتد يسيء لسمعة مصر ولازم يترحل بره مصر فورا
وطبعا ساعتها جمهور الأهلي طبعا يعمل مظاهرة من الجزيرة للمطار ويهتفوا : هتولع ..هتولع ..
نموت نموت وعاش جوزيه حرا مستقلا
وسمعني أغنية : والله وعملوها الرجالة ..ورفعوا راس مصر بلدنا
مراسلكم من تحت علم مصر
أشرف نصر
صورة الحاج الخواجه جوزيه من : www.ahlyegypt.com

2 comments:

مشربية said...

:D :D :D :D :D
اولا عايز اقولك يا اشرف اني الحمد الله معرفش اي حاجة في الكورة بس و انا قاعد بتفرج علي التلفزيون و خصوصا دريم2 لقيت برنامج "الطبعة الاولي" لصاحبة محمد المسلماني الصحفي بالاهرام
قال جملة دخلت دماغي قوي اننا ع شان المتشاط دي سواء كانت مهمة او مش مهمة البلد كلها بتقفل ع شان المتش دة و بعد كل دة ياريتنا عدلين حتي في العب مش عارفين نلعب صح!!!!!!!!!
*ملحوظة: اظاهر و الله اعلم ان المسلماني كمان هياخذ من الحب جانب ع شان جملتة دي!!!

Ashraf Nasr said...

مشربية
طبعا السيناريو اللي حكيته هو فنتازيا خيالية ومحاولة للتغلب بالكوميديا علي طريقة معالجة مشاكلنا
لكن الكوميديا هتقلب مسخرة لو السيناريو ده اتنفذ والمصيبة يا صاحبي ان مفيش مستحيل ف مصر يعني ممكن يحصل
وبالنسبة للطبعة الاولي برنامج جيد فعلا بس محتاج يزيد ف وقته شوية علي الاقل زي برامج تانية نص كم ف نفس القناة ..ومعاه حق طبعا
صباح الفل