Dec 24, 2007

السينما المصرية عدد خاص من مجلة الهلال


تحت عنوان السينما المصرية قرن من سحر الفن السابع أصدرت مجلة الهلال عددا تذكاريا هذا الشهر يحوى عشرات المقالات والصور عن تلك السينما ..تقريبا خطفت العدد من عند البائع ..التهمت صفحاته فى ليلة واحدة ..لكن للأسف الشديد خرجت باستفادة أقل كثيرا من توقعاتى ..استمتعت جدا بالصور فأنا مثل الكثيرين من عشاق أفيشات وصور الأفلام وهو ما توفر في العدد ..لكن الاحباط جاء من المقالات بالعدد فكثير جدا منها آراء انطباعية صحفية لا تحمل المفيد من المعلومات بل وحوت بعضها الأخطاء ولا يوجد سوى دراسة واحدة كتبها المخرج سيد سعيد ..
حتى الذكريات تميزت بعضها بسبب الكتاب أنفسهم مثل الكاتب محفوظ عبد الرحمن ويوسف القعيد ود.رفيق الصبان
لكن مثلا هناك مقالة لا محل لها من الإعراب هى بنت الصياد لدكتور سامى منير عامر فهى عن ذكرياته مع فرقة مسرحية فى مرحلة الجامعة وطلب من صاحبها مرة أن يعلق على أحد الأفلام كما احتوى العدد علي مقالات لصحفيين في دار الهلال دون فائدة تذكر وهى مساحة كان يستحقها أهل السينما من مخرجين وكتاب ومصورين وغيرهم
الملاحظة العامة : أن هناك من خسف بالسينما المصرية الأرض ويرى أنها لا تستحق شيئا مثل الناقد مصطفى درويش الذى لا يرى فيها أى فيلم يستحق الاهتمام إلا فيلم المومياء ويتحدث عما أثاره من اهتمام الغرب بالسينما المصرية
ومع عشقى لفيلم المومياء لكن رأى الناقد فيه مجافاة للواقع الذى يقول أن لدينا غيره
عدد مجلة الهلال
كثير من الصور " الجميلة " - قليل من الموضوعية
وندرة في المقالات المفيدة
أشرف نصر

11 comments:

مشربية said...

ينهار ابيض تخيل يا اشرف اني اتخانقت مع البياع بتاع الجرايد اللي جنبنا ع شان قلت لة احجز لي النسخة الاخيرة لغاية ما اروح البيت اجيب اتنين جنية اللي نقصين ع شان اكمل علي 6 جنية اللي كانوا معايا ع شان اجيبة و روحت لة لقيتة بيقولي واحد اشتراة "اوعة يكون انت يا اشرف" :D

المصيبة انهم بيتكلموا عن السينما المصرية ياعني امفروض يكون كلامهم عن الانجازات مش كلة نقد نقد و يا سيدي لو علي الافيشات في كتاب كامل عن افيشات السينما المصرية اهو استفادة برضة يا اشرف
الف شكر يا معلم :D

Anonymous said...

والله شئ يحير .. يعنى نفتح الشباك ولا نقفلة .. هو احنا كل كام سنه هنحتفل بمائوية السينما المصرية ... هى السينما بتاعتنا دى بقت عاملة زى الرقاصة الكبيرة في السن اللي حاسة ان سوقها بيقف فكل كام شهر بتعمل عيد ميلاد علشان تاخد لها كام هدية وتفكر الناس بيها ... دى قلة ادب والمصيبة انك تلاقي كل مدير مهرجان جديد يخترع لنا ان فى عصرة كملت السينما 100 سنه اية ده ومين المسؤل عن التهريج ده ... طب ايه رايك مثلا انى انا عندى كتاب صادر عن مهرجان القاهرة السينمائي سنه 1995 وكان بيأرخ لمرور 100 سنه فى التاريخ ده .. وكاتب فيه نفس الناس اللي بيكتبوا كل مرة ان السنه دي فيها كملت السينما المصريه 100 سنه .. وعرضرين كل عناصر الصناعه وازاى تطورت .. هابقى اديهولك ... وده مش الكتاب الوحيد زى ما انت عارف ....
الازرق

Ashraf Nasr said...

مشربية
اكيد كنت انا وخبطت ف كتفك وانت معدي وبعدين كل واحد راح طريقه زي الأفلام ..ولا ايه
عاوزك تبعت لي اسم وتفاصيل الكتاب اللي عن الافيشات يعني الناشر مين سنة كام علشان اجيبه
صباح الفل

Ashraf Nasr said...

الأزرق
خد عندك دي واحد زي محمود قاسم بيقول انها لسه ماكملتش غير 80 سنة يعني كمان 20 سنة نلاقي نفس الدوشة والحركات
وكله مفيد يا حبي امال الناس تاكل عيش ازاي
صبح صبح يا عم الحاج

مشربية said...

صح و الله يا اشرف ممكن كل شئ جايز في البلد دي و الله :D

اشرف انت هتلاقية في on the ran و اسمة
افيشات السينما المصرية هو كتاب كبير الناشر تقريبا الشروق
السعر : 60 جنية
صباح الفل و الجمال

Mohamed Kamal Hassan said...

شفت بقى

أنا اللى سبقتك بالزيارة
((:

Ashraf Nasr said...

مشربية
حد قالك عليا ثري عربي ولا رجل أعمال مصري
خليك حلو يا معلم 60 جنية
ومالها صور نتائج جوجل ولا ايه يا عم الحاج
صباح الورد

Ashraf Nasr said...

محمد كمال حسن
منور المكان يا باشا واوعدك بزيارة طويلة لمدونتك لأنها حاجة محترمة بجد وزيارتي الوحيدة ليها كانت مش كفاية لذلك اوعدك بزيارة ارغي فيها كتير عن تدويناتك
صباح الفل

مشربية said...

يا معلم انا اكتفيت اني اتفرج علية و كان من حسن حظي ان في كتاب منهم كان من غير ورق ملفوف علية فا اتفرجت و الله مافييش احسن من جوجل و الله انت بتتكلم صح :D
ال 60 جنية قال بلا كلام فاضي يا راجل :D

Anonymous said...

لو عايز افيشات السينما ادخل على dvd4arabهتلاقي واحد عامل موضوع كامل عن الافيشات ومنزل افيشات كتيييييييييير وانا عندى افيشات نمزلها لو عايزها .. بس مش فاكر اسماء المواقع هابقي ادور لك عليها فى الجهاز بتاع الشغل لانها فى الاغلب متسيفه عليه ..لانى كان فى دعايه انا عاملها مستخدم فيها البوسترات فنزلت كتير ...
الازرق .. مش اي لون تانى

Ashraf Nasr said...

الأزرق مش اى لون تاني
واحشني اولا
طمني عليك
ثانيا : في انتظار المواقع
بلاش الاختفاء كده
صباح الفل