الشاب "ع" شاب كوول ..مش كوول آخر حاجة بس بيحاول ..دهن شعره بالكريم واتاكد انه مش ناسي الهاند فري والعلبة ال إل إم والولاعة ..وركب الميكروباص من اسكندرية لمصر ..اللي هي القاهرة بس زي معظم الناس خلاص اتعود يسميها مصر
قعدته في العربية جنب الشاب " ن"..اكبر منه شوية وواضح أنه في وظيفة محترمة ..او علي الاقل "ع" افتكر كده لأن الشاب "ن" كان معاه آي فون ولابس قميص شيك ونضارة شمس غالية ..زي العادة "ع"استني حبة علي العربية ما تتحرك ويتأكد إن السواق مش هيشغل الكاسيت بالسماعات الكبيرة اللي هتضيع عليه متعة سماع الأغاني اللي محملها علي موبايله..
موبايل "ع"رن بنغمة الأغنية الأحنبية اللي الحقيقة مش عارف ترجمة كلماتها لكن بيحبها ..بعد ما خلص مكالمته لقي الشاب "ن" بيفتح معاه الكلام وهو بيقول
- حلوة النغمة دي
- تحب ابتعهالك
- اوكي انا هافتح البلوتوث
وفي لحظات كان "ع" بعت لموبايل "ن" النغمة ..وفكر يأخد نغمات من "ن"ورحب "ن" جدا وببساطه قاله
- آدي الملف ..علم علي اللي تحبه وانقله
بس "ع" لقي الملف كبير وبصراحه طمع فقرر يعلم علي الملف كله ويبعت لموبايله ..وبعد ما خلص بدأ يسمع حاجات من اللي نقلها وبعدين سأل "ن" عن أغنية معينة قبل ما يشغلها
- هي دي أغنية القدس
اتوتر "ن" للحظة وقاله :-لأ
شك "ع"ف توتر "ن" وحس ان "ن" متغاظ منه لأنه نقل كل الملف فركز في اسم الملف لقاه اسمه
القداس
وساعتها التوتر اتنقل للشاب " ع" وركز في باقي اسماء النغمات فلقي بين الأغاني موعظة الأحد والقداس
بصوا لبعض وفهم "ع" فزغر للشاب "ن"وبدأ يحط الموبايل في مستوي نظر"ن" علشان يتأكد انه شايف اللي هيعمله وبدأ "ع" يحذف كل الملف اللي خده من "ن" بما فيها الأغاني اللي كان بيدور عليها من فترة
وحط "ع" الهاند فري في جيبه وشغل الموبايل بأعلي درجة من الصوت
ولحد ما وصلوا للقاهرة
فضل صوت القرآن وخطب أبو إسحاق الحويني شغال
وفضل"ع" و"ن" ما يبصوش لبعض
وأول ما نزلوا من العربية
كل واحد منهم راح ف طريقه متنرفز جدا
بس خلاص
أشرف نصر
No comments:
Post a Comment