Jul 27, 2007

شريط رسائل قناة الحب كله

أكيد خطف عينك ف مرة شريط رسائل في قناة فضائية ..ومن يتابع تلك الرسائل يمكنه التعرف علي مجتمعاتنا ولو فكرة مبدئية ..بص وشوف
1- حالة كبت وفراغ عاطفي ليس له حدود ..مثلا قناة روتانا زمان ستجد بها اقبالا غير عادي علي مراسلة شخص يتخذ لقب الظل يعطي كمية هائلة من النصائح وخاصة للبنات
طبعا غير الرسايل اللي تضحك زي :أنا شبه ميرفت أمين عاوزة أتعرف
مش فاهم اللي شبه ميرفت برضه هتدور علي شباب ف الشات
ولا دي : رجل أعمال يبحث عن ليدي
وآخره أعمال يدوية صنايعي يعني ومكسوف يقول
2- حالة من هوس الدعوة للإيمان ..اللي يطلب من الناس أن تقول الأدعية الاسلامية ..واللي يهني بالجمعة المباركة رغم انه وقت صلاة الجمعة ..طيب روح صلي مثلا ..واللي هاري الناس بطلب دعاء الله بالشفاء له أو لأحد أقاربه ..ومش فاهم هل ربنا محتاج قراءة شريط الرسائل ليشفي عباده ..طيب اللي رصيدهم خلص ايه النظام
تحبوا سؤال محرج : لو مسيحي بعت رسالة حب في يسوع أو العذراء بلاش هيدعي الناس لدينه ..تفتكروا هتتعرض
3- ناس كتير بتفرح بقراءة اسمها ومش مهم ليه ..اللي بيمسي علي الحاج فلان
واللي كاتبة : والنعمة بحبك يا زوجي مراتك فلانة
وخد عندك :اللهم اصلح بيني وبين زوجتي فلانة ..طيب ده تقوله ايه
غير طبعا اللي نازل تأييد علي روحه في أي انتخابات ولو انتخابات الجراج
4- لازم تظبط القناة بكلمتين حلوين علشان الكنترول يهتم برسالتك ..واكبر مثال يضحك قناة المحور
اي حاجة تعرضها تنزل الرسايل محبة في القناة حتى لو اعلان سمنه هتلاقي برافو المحور موضوع مهم كنا محتاجينه
5- انسي السياسة كل القنوات ما بتعرضهاش او بتعرض الرسايل الامان يعني بارك الله في الملك فلان أو الرئيس علان
6- الحروب الحقيقية هي بين مشجعي الكرة بين :النادي الفلاني أعظم أندية الكرة الأرضية والكرة الشراب
ولازم طبعا بهدلة الاندية الاخري وهي اكثر الرسائل التي تفلت فيها الشتائم من الكنترول ربما عن عمد
7- الموضوع مربح جدا بدليل ان كتير من القنوات جابت م الاخر واقتصرت علي الشات
وبلا برماج بلا وجع دماغ ..خاصة في الخليج وادفع يا فالح

أخيرا جاء لقناة الحب كله رسالة : أنا
مدون شاب أرغب في صداقة فتاة أمورة شبه مونيكا بيلوتشي
وأمرنا لله لو شبه كيت وينسلت
أشرف نصر

2 comments:

مشربية said...

اصلا دة اللي اسمة الاختراع الفاشل بجد و اساسا انا شاكك في الردود احيانا لانها سعات بتكون من رجل الكنترول نفسة و بالنسبة "للظل" بتاع روتانا اكيد واحد من الكنترول و خذ عندك قناة تانية جنب روتانا زمان فية المحور فيها رسائل مسخرة
الف شكر يا اشرف علي الموضوع

Ashraf Nasr said...

علشان أكون واضح يا محمد أنا بحاول أفهم ليه أكتر من فكرة التريقة عليهم خصوصا أن التريقة يمكن بسهولة انك تطلعها من ساعة واحدة بين القنوات
لكن رغم سخريتي في التدوينة لكن نفسي أفهم بجد قد كده سهل يتنصب علينا
وقد كده الناس بطلت تكلم بعض في الواقع وخلاص معدش غير الكلام في الرسايل ضمن إطارات كاذبة واكليشهات حتى في المرض والحب والصداقة
وعجبي
شكرا لمتابعتك يا استاذ