امبارح 20أغسطس معدي من قدام قصر الثقافة علي أمل الاقي حازم معاك علي القهوة أو في القصر لكن لقيت يافطة سوداء طويلة بتنعيك يا محمد ..وقفت متسمر ومش فاهم ..أكيد فيه لبس أو حد غيرك ..مش طبيعي تكون انت وانت من عشاق الدنيا ..ورجعت لفيت مرة واتنين يمكن الاقي حد يفهمني وابص للوحة وهي زي ما هي بنفس سخافتها وتأكيدها علي الخبر المشئوم ..اتغظت ان مفيش حد كلف نفسه وبلغني ..ودورت في الجرايد ملقيتش ..النهاردة اول ما دخلت ع النت دورت لقيت موقعك اللي منه الصورة دي ..ولقيت تفاصيل توجع اكتر علي موقع القصة العربية ..اول حاجة ان ده حصل 4 أغسطس يعني اكتر من 16 يوم وانا مش مدي خوانة ومتوقع انك هناك في الفيوم بتكتب قصيدة جديدة او بتشجع حد جديد او بتجهز لمؤتمر أو ندوة جديدة ..لكن زعلي ان محدش بلغني بقي حاجة صغيرة قوي جنب تفاصيل الحادثة العبثية ..قد كده الدنيا بتغدر ..قد كده قسوتها وسخريتها منامع السلامة يا أبو عبد العزيز
مع السلامة يا جميل
أشرف
4 comments:
يا نهار ابيض داما بيقولوا بيفتكروا الناس لما بتموت دة ولا افتكروه و هو عايش ولا و هو ميت الف رحمة عليك ييا فنان
و انا اللي اسف علي التاخير في الرد عليك يا أشرف
مش للدرجة دي في ناس افتكروه حيا وميتا مش كتير صحيح بس المثقف محدش بيفتكروه غير المكويين بنار الكتابة زيه
كل المشكلة في الدنيا اللي كانت بتطلع لي لسانها وهي بتاخد اللي بحبهم واحد ورا التاني
انا ماكنتش اعرفه
بس كان في حد بحبه جدا يعرفه
لما شوفت تأثير موته على الحد دة ..
قررت اني ادور وراه ..
و دي اول حاجة اقراها عنه
الله يرحمه
...مرحبا انسانة
يمكنك كراجعة التدوينة التالية لدي وهي بعنوان بنت ماولدتهاش ولادة وهو عنوان الديوان الثاني للجميل ممد عبد المعطي وعن المواقع هناك موقع القصة العربية ومدونات شعراء العامية مثل صفحة شحاتة ابراهيم ومسعود شومان وصفحة محمد عبد المعطي هي في اللينك ده
http://mabdelmoaty56.wetpaint.com
ربما اقول ربما تعرفين السبب في محبة الناس له مرة أخري ربما لأن فارق كبير بين من يحكون عن شخص ومن يحسون بصدق ونقاء هذا الشخص .
Post a Comment