بنت ما ولدتهاش ولادة

نشر للشاعر محمد عبد المعطي ديوان : رحيق الشهد والمحاياة وديوان : بنت ما ولدتهاش ولادة ..والعديد من القصائد بالمجلات والجرائد وصفحات الأدب ..غير العشرات من الأغاني في مسرحيات قدمت في قصور الثقافة ..وغنت له عزة بلبع أغنية القدس ..لكن أجمل ما تركه عبد المعطي محبته في قلوب الأدباء المصريين الذين عرفوه في المؤتمرات بالفيومي الساخر وعرفوا الفيوم بأنها بلد عبد المعطي الشاعر والإنسان الجميل ..يقول محمد
ماشية بتتعايق قدامك
طب كلمها
أو حتى ارمش لها من تحت لتحت وفوز باللحظة
شايف ..أهي بصت لك وكأنها غرقانة ف دهشتها
وعنيها بتسأل ..خجلان ولا بتصطنع التقل عليها
برضه ما رديتش البصه
إزاي ودي بنت ما شوفتش زيها ولا هتشوف
دي موقفة رجالة علي شنابها ..
ومالية الشارع بهجة وزغاريد
راخية لك إنت لوحدك في دلالها ..
الله يخرب عقلك
شاورت لك
وقالت لك كل كلام االعشق اللي مايتقالش لواحد
من غير ما تحرك شفايفها ..فردت لك ملايتها
ومدت قلة لو تشربها مش ممكن تعطش أبدا
بس اتشجع ولاغيها وحرك مفاتنها
بنت ما ولدتهاش ولادة
جناينها بتطرح رمان ونبيت وزتون وبلح امهات
وسبايط موز
ومصباتها مسك وعنبر وحليب وخمور
كشفت لك عن مرمرها ياريتك تلمسها
وشالت لك سمنتها ف كفه ..
وعسلها علي الكفه التانيه
محمد عبد المعطي
من قصيدة " بنت ما ولدتهاش ولادة "
هتوحشني يا محمد
أشرف