Sep 19, 2007

رمضان اللي كان


يوم رؤية الهلال كان يوم مهم جدا في بلدنا كنا بنسميه يوم الرؤية وده بقي ساعة العصر يخرج موكب كبير جدا مكون من عربيات نقل تلف البلد كلها وفي قلب الموكب كان التجار وارباب الحرف وكل واحد يعرض بضاعته علي الناس اللي وافقة علي الصفين تتفرج يعني بتاع الفراخ لازم يرفع فرخته ويتباهي بيها وبتوع الاقفاص يرقص ومدخل دماغه في القفص بالمناسبة كان لازم يلازمهم الطبل والزمر والاطفال علي الصفين والخارجين من الحواري عاملين كورال بيقول كلمة واحدة :الرؤية ..الرؤية وعلي فكرة كان دايما يمر المأمور قدام الموكب علي حصان وبعد ان يلف الموكب البلد يقفوا عند صوان كبير فيه الاحتفال الديني الرسمي خاصة وانه اثناء الموكب كعادة المصريين في كل الاحتفالات الشعبية يحدث انفلات اخلاقي يزعج رجال الدين مثل الرجل الذي يخلع قمصة ويتلوي بميوعة او التاجرة اللي بتشرب سيجارة ودي طبعا مصيبة غير المعاكسات وما شابه في الزحمة ..الصوان يكون به المشايخ ومندوب من الكنيسة لبدء الاحتفال الرسمي وطبعا كانت الناس اول ما يوصل الموكب للصوان اللي شبه صوان العزا علي طول تلف وترجع ..دماغك
يخلص اليوم المبهج السعيد علشان ندخل رمضان بفرحة حقيقية ..
طبعا اول حاجة مسحراتي يلف حواليه الاطفال شارع شارع هو بالطبلة الفخار وهما بالفوانيس ام شمعة او ام حجارة مش مهم ..
لنصل لنهار رمضان
يمر اليوم الاول صعب وطويل وكل واحد مننا احنا الاطفال بيحاول يثبت ان زميله فاطر علشان يغني ويغيظه
يا فاطر رمضان يا خاسر دينك
الكلبة السوده هتشخ علي جبينك
ونفضل في نقار لحد العصر ندخل نصلي ونقرا شوية قرآن وبعدها نسلم نمر وتمر الساعة الاخيرة دي واحنا بنطلع في الروح وكنت بأحب اشوف جدي وهو بيعمل بنفسه العرقسوس اللي كان ما يشربوش اللي اذا كان من عمايل ايده
ويوم اتفرج علي بتاع الكنافة الشعر علي الفرن البلدي ويوم بتاع القطايف ولازم طبعا صلاة الفجر بعد التواشيح الجميلة ولازم الواحد يغيظ اصحابه حفظ كام جزء لحد ما فجأة الاقي نص رمضان عدي وبدأ استعداد محموم لدخول العيد
الاطفال اهم حاجة عندهم الللبس والجزمة الجديدة
والأمهات الكحك والبسكويت
والابهات طبعا يدعوا علي الاطفال والامهات والكحك وسنينه
كان كل سنة لازم الشهر مايعديش كده لازم مصيبة او كارثة
مش الدنيا حبة حلوة وحبة مرار
يبقي لازم موتة تحصل واهل الميت يعذبونا بأننا ندفنه في الصيام هو يستريح واحنا يطلع عنيينا في عز الشمس ومشوار الترب اللي يكفر السيئات اللي عدت من الصيام
ولازم كام خناقة علي الماشي
بس للأمانة كان لا يمكن حد يتجرأ أيامها ويسب الدين "اللي بقي لبانه في بق الخلق دلوقتي"ياه
اول مرة حصل حاجة غيرت عادات الشهر الكريم في بلدنا كان حادثة طائفية وحصل حظر تجول وامن مركزي
لكن ده موضوع تاني ممكن ارجعله بعدين
ياه فجأة اكتشفت ان سنين وسنيين عدت علي الكلام ده
لا عاد فيه رؤية
ولا عاد فيه أفران بلدي للكنافة
ولا أطفال بتلف ورا مسحراتي
أصلنا اسم الله كبرنا
ولا عاد جدي بيعمل العرقسوس بايده
أصل جدي مات
أشرف نصر
الصورة من :
www.arabiyat.com

12 comments:

مشربية said...

اولا حقيقي اسف علي التاخير في جملة "رمضان كريم "
ثانيا : انت ناسي "كبتن كبتن وريني لسانك - و اعمل صباعك كدة "
و حقيقي انت بينتلي انك كاتب عبقري و الله انا شايف الصور اللي انت كتبها و كان نفسي اعيش فيها للاسف مشفتش الايام دي او المكان اللي انا فية مبقاش فية الحجات الجميلة دي
رمضان كريم عليك يا ريس و حقيقي احلي قفلة لاحلي موضوع شوفتة في حياتي :D

Anonymous said...

جدك مات يا اشرف و ماتت معاه كل حاجه حلوه زى كل الحلوين ما بيروحوا، الله يرحم كل حاجه و اى حاجه ، رمضان كريم
طارق زمزم

ashrafnasr said...

مشربية
وانت طيب وجميل

ashrafnasr said...

طارق
ياااااااااه فينك يا عم طارق واحشني يا باشا ..حمدا لله ع سلامتك في التعليقات عقبال ما نشوفك وتظهر شويه

Anonymous said...

يا أشرف مش عارف ليه وانا باقري كلامك افتكرت اغنيه عبد المطلب ودع هواك .... ياعمى عمر اللى فات ما هيرجع تانى .. انسي .. بس المهم فى الموضوع . احنا في مصر كنا بنغنى ونقول يا فاطر رمضان ياخسران دينك بكرة القطه السوده تقطع مصارينك ..يعنى برضه احسن مكن شخه الكلب شويه ..ولا ايه ..خالد

ashrafnasr said...

خالد
بحب أغنية طلب الجميلة
بس مش هانسي
أما عن أغنيتنا واحنا أطفال
ده تراث بكل عبله
عاجبك ولا لأ
صباح الفل

Anonymous said...
This comment has been removed by a blog administrator.
ashrafnasr said...

الأستاذ اللي حذفت تعليقه وهو عارف نفسه عيب عيب عليك
لو هنتشتم هنسيب إيه للعيال الوحشين ..بجد آسف لحذف التعليق لكن الهزار ف اللطيف ميه ميه إنما كده كخه
والزعل ممنوع

Anonymous said...

حبيبي انا ما اقصدش ..اى اهانه وانت عارف بس ده من روح الموضوع وذكريات ....الطفوله ولا انت افتكرت كل حاجه ونسيت دى

Anonymous said...

وبعدين ارفع علي قضية بقي ... مش انت محامى .. واناباقول رأى اعتبرها من قضايا النشر مهو ابرهيم عيسي مش احسن منى بقي ولا انت اقل من الريس ولا ايه....وعلى رأي اسماعيل يسي .. فتشنى فتش

Anonymous said...

على فكرة التعلقين اللي فاتوا ..بتوع الاستاذ اللي حذفت موضوعه ..اللي مايتسماش

ashrafnasr said...

خاااااااااااااااااااااالد
صديقي العزيز عبد العزيز قصدي خالد
قلتلك الزعل ممنوع من ناحيتي وناحيتك
بطل بواخه
وعلي فكرة أنت مش أقل من إبراهيم عيسي وبالتأكيد أنا مش أقل من الرئيس المهم علشان خاطري ابقي سيب اسمك أو لقب بتحبه
صباح الفل
والزعل مرفوض مرفوض مرفوض يا ولدي