رمضان اللي كان

يوم رؤية الهلال كان يوم مهم جدا في بلدنا كنا بنسميه يوم الرؤية وده بقي ساعة العصر يخرج موكب كبير جدا مكون من عربيات نقل تلف البلد كلها وفي قلب الموكب كان التجار وارباب الحرف وكل واحد يعرض بضاعته علي الناس اللي وافقة علي الصفين تتفرج يعني بتاع الفراخ لازم يرفع فرخته ويتباهي بيها وبتوع الاقفاص يرقص ومدخل دماغه في القفص بالمناسبة كان لازم يلازمهم الطبل والزمر والاطفال علي الصفين والخارجين من الحواري عاملين كورال بيقول كلمة واحدة :الرؤية ..الرؤية وعلي فكرة كان دايما يمر المأمور قدام الموكب علي حصان وبعد ان يلف الموكب البلد يقفوا عند صوان كبير فيه الاحتفال الديني الرسمي خاصة وانه اثناء الموكب كعادة المصريين في كل الاحتفالات الشعبية يحدث انفلات اخلاقي يزعج رجال الدين مثل الرجل الذي يخلع قمصة ويتلوي بميوعة او التاجرة اللي بتشرب سيجارة ودي طبعا مصيبة غير المعاكسات وما شابه في الزحمة ..الصوان يكون به المشايخ ومندوب من الكنيسة لبدء الاحتفال الرسمي وطبعا كانت الناس اول ما يوصل الموكب للصوان اللي شبه صوان العزا علي طول تلف وترجع ..دماغك

يخلص اليوم المبهج السعيد علشان ندخل رمضان بفرحة حقيقية ..

طبعا اول حاجة مسحراتي يلف حواليه الاطفال شارع شارع هو بالطبلة الفخار وهما بالفوانيس ام شمعة او ام حجارة مش مهم ..

لنصل لنهار رمضان

يمر اليوم الاول صعب وطويل وكل واحد مننا احنا الاطفال بيحاول يثبت ان زميله فاطر علشان يغني ويغيظه

يا فاطر رمضان يا خاسر دينك

الكلبة السوده هتشخ علي جبينك

ونفضل في نقار لحد العصر ندخل نصلي ونقرا شوية قرآن وبعدها نسلم نمر وتمر الساعة الاخيرة دي واحنا بنطلع في الروح وكنت بأحب اشوف جدي وهو بيعمل بنفسه العرقسوس اللي كان ما يشربوش اللي اذا كان من عمايل ايده

ويوم اتفرج علي بتاع الكنافة الشعر علي الفرن البلدي ويوم بتاع القطايف ولازم طبعا صلاة الفجر بعد التواشيح الجميلة ولازم الواحد يغيظ اصحابه حفظ كام جزء لحد ما فجأة الاقي نص رمضان عدي وبدأ استعداد محموم لدخول العيد

الاطفال اهم حاجة عندهم الللبس والجزمة الجديدة

والأمهات الكحك والبسكويت

والابهات طبعا يدعوا علي الاطفال والامهات والكحك وسنينه

كان كل سنة لازم الشهر مايعديش كده لازم مصيبة او كارثة

مش الدنيا حبة حلوة وحبة مرار

يبقي لازم موتة تحصل واهل الميت يعذبونا بأننا ندفنه في الصيام هو يستريح واحنا يطلع عنيينا في عز الشمس ومشوار الترب اللي يكفر السيئات اللي عدت من الصيام

ولازم كام خناقة علي الماشي

بس للأمانة كان لا يمكن حد يتجرأ أيامها ويسب الدين "اللي بقي لبانه في بق الخلق دلوقتي"ياه

اول مرة حصل حاجة غيرت عادات الشهر الكريم في بلدنا كان حادثة طائفية وحصل حظر تجول وامن مركزي

لكن ده موضوع تاني ممكن ارجعله بعدين

ياه فجأة اكتشفت ان سنين وسنيين عدت علي الكلام ده

لا عاد فيه رؤية

ولا عاد فيه أفران بلدي للكنافة

ولا أطفال بتلف ورا مسحراتي

أصلنا اسم الله كبرنا

ولا عاد جدي بيعمل العرقسوس بايده

أصل جدي مات

أشرف نصر

الصورة من :

www.arabiyat.com